ថ្ងៃទី៦ ឧសភា ២០២៦
ជំនួបសម្តែងការគួរសម និងប្រគល់សម្ភារៈឌីជីថល និងតុ សម្រាប់សាលារៀនរងផលប៉ះពាល់តាមបណ្តោយព្រំដែន ពីអង្គការអេដ អេ អាក់ស្យុង (Aide et Action)
រាជធានីភ្នំពេញ៖ នាព្រឹកថ្ងៃទី០៦ ខែឧសភា ឆ្នាំ២០២៦ នៅទីស្តីការក្រសួង ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានទទួលជួបសម្តែងការគួរសម និងប្រគល់សម្ភារៈឌីជីថល និងតុ សម្រាប់សាលារៀនរងផលប៉ះពាល់តាមបណ្តោយព្រំដែន ពីអង្គការអេដ អេ អាក់ស្យុង (Aide et Action) ដឹកនាំដោយ លោក វន សំភាស់ នាយកប្រចាំប្រទេសអង្គការអេដ អេ អាក់ស្យុង និងមានការអញ្ជើញចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា និងមន្ត្រីពាក់ព័ន្ធក្រោមឱវាទ។
ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះអង្គការ អេដ អេ អាក់ស្យុង ដែលបានចូលរួមចំណែកយ៉ាងសកម្មក្នុងការលើកកម្ពស់វិស័យអប់រំឌីជីថល តាមរយៈការឧបត្ថម្ភកុំព្យូទ័រចំនួន ២០០ គ្រឿង តុសិស្សចំនួន ១៥០ បណ្ណាល័យឌីជីថលក្រៅបណ្តាញចំនួន ០៣ គ្រឿង ព្រមទាំងសម្ភារៈសិក្សា និងគ្រឿងបរិភោគជាច្រើនទៀតជូនក្រសួងអប់រំ យុវជន និងកីឡា ដើម្បីជួយដល់បុគ្គលិកអប់រំ លោកគ្រូ អ្នកគ្រូ និងសិស្សភៀសសឹកដែលទទួលរងផលប៉ះពាល់ពីជម្លោះព្រំដែននាពេលកន្លងមកនេះ។ ឯកឧត្តមបណ្ឌិតសភាចារ្យ ជឿជាក់ថា សម្ភារៈឧបទេស និងបរិក្ខារបច្ចេកវិទ្យាទាំងនេះ នឹងក្លាយជាឧបករណ៍ដ៏មានសារៈសំខាន់ក្នុងការបើកឱកាសឱ្យសិស្សានុសិស្សនៅតាមតំបន់ព្រំដែន និងតំបន់ដាច់ស្រយាល អាចទទួលបានការអប់រំតាមបែបបច្ចេកវិទ្យាទំនើបប្រកបដោយសមធម៌ និងប្រសិទ្ធភាពខ្ពស់ ស្របតាមចក្ខុវិស័យរបស់រាជរដ្ឋាភិបាល។
រូបភាព 9 សន្លឹក
សូមជម្រាបថា ក្រសួងអប់រំ យុវជន និងកីឡា នៅតែបន្តទទួលរាល់សម្ភារៈ ថវិកា កញ្ចប់សម្ភារៈសិក្សា សម្ភារៈប្រើប្រាស់ចាំបាច់ និងគ្រឿងឧបភោគបរិភោគនានា ពីសប្បុរសជនគ្រប់មជ្ឈដ្ឋានទាំងអស់ ដើម្បីបែងចែក និងដឹកជញ្ជូនបន្តទៅដល់បុគ្គលិកអប់រំ លោកគ្រូ អ្នកគ្រូ និងសិស្សភៀសសឹកនៅតាមបណ្ដាខេត្តដែលរងផលប៉ះពាល់ ក៏ដូចជាសាងសង់លេណដ្ឋានពហុបំណង ដើម្បីការពារសុវត្ថិភាពបុគ្គលិកអប់រំ និងសិស្សានុសិស្ស ក្នុងករណីមានហេតុការណ៍អាសន្នណាមួយកើតឡើង៕
សូមចុចអាន៖ https://www.facebook.com/share/p/1BDMk1LB3r/
