ក្រសួងពាណិជ្ជកម្ម បើកវគ្គបណ្តុះបណ្តាលស្តីពី «ការប្រើប្រាស់ប្រព័ន្ធការងារឌីជីថល Microsoft Office 365» ដើម្បីពង្រឹងសមត្ថភាពមន្ត្រីរាជការ និងជំរុញរដ្ឋាភិបាលឌីជីថល

(ភ្នំពេញ)៖ នាព្រឹកថ្ងៃសុក្រ ទី២២ ខែឧសភា ឆ្នាំ២០២៦ នេះ នៅទីស្តីការក្រសួងពាណិជ្ជកម្ម មានរៀបចំពិធីបើកវគ្គបណ្តុះបណ្តាលស្តីពី «របៀបប្រើប្រាស់ Microsoft Office 365» ក្រោមអធិបតីភាពរបស់ លោកជំទាវ ជា រដ្ឋា រដ្ឋលេខាធិការក្រសួងពាណិជ្ជកម្ម និងជាសមាជិកគណៈកម្មាធិការរដ្ឋាភិបាលឌីជីថល ដោយមានការអញ្ជើញចូលរួមផ្ទាល់ពីថ្នាក់ដឹកនាំ និងមន្ត្រីរាជការនៃអគ្គនាយកដ្ឋាន/អង្គភាពចំណុះក្រសួងពាណិជ្ជកម្ម ព្រមទាំងមានការចូលរួមតាមប្រព័ន្ធនិម្មិត (Zoom Video Conference) ពីថ្នាក់ដឹកនាំ និងមន្ត្រីបង្គោលនៃមន្ទីរពាណិជ្ជកម្មរាជធានី-ខេត្ត ទាំង២៥ ផងដែរ។

វគ្គបណ្តុះបណ្តាលដ៏មានសារៈសំខាន់នេះ ត្រូវបានរៀបចំឡើងក្រោមកិច្ចសហការយ៉ាងជិតស្និទ្ធរវាង ក្រសួងពាណិជ្ជកម្ម និងក្រសួងប្រៃសណីយ៍និងទូរគមនាគមន៍ ស្របតាមស្មារតីនៃអនុស្សរណៈនៃការយោគយល់គ្នា (MoU) ក្នុងគោលបំណងលើកកម្ពស់បរិវត្តកម្មឌីជីថល និងបង្កើនប្រសិទ្ធភាពការងាររដ្ឋបាល សេវាសាធារណៈ ព្រមទាំងកិច្ចសម្រួលពាណិជ្ជកម្ម។

រូបភាព 4 សន្លឹក

សូមជម្រាបជូនថា ការធ្វើទំនើបកម្មសមត្ថភាពផ្នែកបច្ចេកវិទ្យាដល់មន្រ្តីនៃក្រសួងពាណិជ្ជកម្មនាពេលនេះ គឺជាជំហានគន្លឹះមួយក្នុងការឆ្លើយតបទៅនឹង «ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា» និង «គោលនយោបាយរដ្ឋាភិបាលឌីជីថលកម្ពុជា ២០២២-២០៣៥» ដើម្បីធានាថាការផ្តល់សេវាសាធារណៈ ជូនវិស័យឯកជន ពាណិជ្ជករ និងសាធារណជន ប្រកបដោយ ប្រសិទ្ធភាព និងឆាប់រហ័ស៕

សូមចុចអាន៖ https://www.facebook.com/share/p/1Hnm49kSac/