ភាពបុរេសកម្ម និងឆន្ទៈចូលរួមអនុវត្តកម្មវិធីរាជរដ្ឋាភិបាល «ថ្នាលបាយ័ន» របស់ក្រសួង ស្ថាប័ន ជាជំហានដ៏សំខាន់មួយឆ្ពោះទៅរកការកែទម្រង់រដ្ឋបាលសាធារណៈទំនើប

ក្រោមកិច្ចសហការរវាងក្រសួងមុខងារសាធារណៈ ជាមួយក្រសួងប្រៃសណីយ៍ និងទូរគមនាគមន៍ បានរៀបចំវគ្គបណ្តុះបណ្តាលស្តីពីការអនុវត្តថ្នាលឌីជីថល «ថ្នាលបាយ័ន» សម្រាប់ការគ្រប់គ្រង និងការបញ្ជូន-ទទួលឯកសាររបស់ក្រសួង ស្ថាប័ន ជូនដល់សិក្ខាកាមជា ថ្នាក់ដឹកនាំ ប្រធានអង្គភាព និងមន្រ្តីជំនាញមកពីបណ្តាក្រសួង ស្ថាប័នចំនួន២៨ ដែលមានសមាសភាពចូលរួមសរុបចំនួន ៣៣៦រូប។

ថ្នាលថ្មីនេះ បង្កើតឡើងក្រោមគំនិតផ្តួចផ្តើមដោយផ្ទាល់របស់ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ ក្រោមការសម្របសម្រួល និងគាំទ្រយ៉ាងសកម្មពី ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ ក្នុងគោលដៅធ្វើបរិវត្តកម្មប្រព័ន្ធគ្រប់គ្រង និងការបញ្ជូន-ទទួលឯកសាររដ្ឋបាល នៅតាមបណ្តាក្រសួង ស្ថាប័នឱ្យកាន់តែមានភាពរហ័ស តម្លាភាព និងប្រសិទ្ធភាពខ្ពស់។

+6

រូបភាព 11 សន្លឹក

តាមរយៈការបណ្តុះបណ្តាលចែករំលែក បានផ្តល់ចំណេះដឹង យល់កាន់តែច្បាស់ពីរបៀបប្រើប្រាស់ និងអត្ថប្រយោជន៍នានាដល់ប្រតិបត្តិករទាំងអស់តាមរយៈបទបង្ហាញអំពី៖ ទស្សនាទានទៅលើការអនុវត្តថ្នាល ប្រព័ន្ធថ្នាល ការអនុវត្តជាក់ស្តែងលើការប្រើប្រាស់ថ្នាល និងសំណួរ-ចម្លើយ។ ថ្នាលថ្មីនេះ «ថ្នាលបាយ័ន» ជាចលករពន្លឿនចរន្តលំហូរលិខិតរដ្ឋបាលរបស់ក្រសួង ស្ថាប័នឱ្យមានភាពងាយស្រួល សាមញ្ញ កាត់បន្ថយពេលវេលា ធានាប្រសិទ្ធភាព ល្អប្រសើរសម្រាប់ការប្រើប្រាស់ និងប្រើប្រាស់ដោយទំនុកចិត្ត។

សូមជម្រាបថា ដំណើរការនៃវគ្គបណ្តុះបណ្តាលនេះ បានប្រព្រឹត្តទៅចែកចេញជា ៤វគ្គ ដាច់ដោយឡែកពីគ្នា សម្រាប់ក្រសួង ស្ថាប័នចំនួន២៨ មានរយៈពេល៤ថ្ងៃ នៅគណៈកម្មាធិការកែទម្រង់រដ្ឋបាលសាធារណៈ នៃក្រសួងមុខងារសាធារណៈ។

សូមចុចអាន៖ https://www.facebook.com/share/p/1Cwt8gF5iN/