គណៈប្រតិភូនៃក្រសួងប្រៃសណីយ៍និងទូរគមនាគមន៍ និងអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល បានអញ្ជើញចូលរួមក្នុងកម្មវិធី Lao Digital Week 2024 នៅសាធារណរដ្ឋប្រជាធិបតេយ្យប្រជាមានិតឡាវ

សាធារណរដ្ឋប្រជាធិបតេយ្យប្រជាមានិតឡាវ៖ ឯកឧត្តម សូ វិសុទ្ធី រដ្ឋលេខាធិការក្រសួងប្រៃសណីយ៍និងទូរគមនាគមន៍ ឯកឧត្តម ជា សេរីវឌ្ឍ អគ្គលេខាធិការនៃអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល ថ្នាក់ដឹកនាំនិងសហការីបានអញ្ជើញចូលរួមក្នុងកម្មវិធី Lao Digital Week 2024 នៅសាធារណរដ្ឋប្រជាធិបតេយ្យប្រជាមានិតឡាវ ក្នុងរយៈពេល ៣ថ្ងៃ ចាប់ពីថ្ងៃទី ៩​-១១ ខែមករា ឆ្នាំ២០២៤។ ក្នុងអំឡុងពេលបើកកម្មវិធី Lao Digital Week 2024 ឯកឧត្តម Sonexay Siphandone នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ និងជាប្រធានគណៈកម្មាធិការជាតិឡាវសម្រាប់បរិវត្តកម្មឌីជីថល បានមានប្រសាសន៍ថា៖ <<ដើម្បីកសាងភាពជោគជ័យនៃការធ្វើបរិវត្តកម្មឌីជីថល យើងត្រូវតែសម្រេចចិត្តបម្លែងការស្រមើស្រមៃ និងសកម្មភាពរបស់យើង ជាពិសេសក្នុងការអភិវឌ្ឍ និងការដាក់ឱ្យប្រើប្រាស់បច្ចេកវិទ្យាឌីជីថលនៅទូទាំងប្រទេស ដើម្បីបំពេញតម្រូវការរបស់សហគមន៍ និងប្រជាពលរដ្ឋឱ្យបានទាន់ពេលវេលា ត្រឹមត្រូវ និងមានតម្លាភាព>>។ នៅក្នុងកម្មវិធីនេះ គណៈប្រតិភូកម្ពុជាបានអញ្ជើញចូលរួមក្នុងការបើកសម្ពោធកម្មវិធី Lao Digital Week ហើយទន្ទឹមនឹងនេះ ក៏មានការអញ្ជើញចូលរួមក្នុងកម្មវិធីសម្ពោធ Lao Digital Forum ផងដែរ ព្រមទាំងមានការចែករំលែកនូវបទពិសោធ និងកត្តាជោគជ័យនៃការធ្វើបរិវត្តកម្មឌីជីថលជូនភាគីឡាវ និងវៀតណាម និងកិច្ចប្រជុំបច្ចេកទេសពិភាក្សាអំពីការចែករំលែកបទពិសោធក្នុងការកសាងរដ្ឋាភិបាលឌីជីថល។

ជា​លទ្ធផលនៃកម្មវិធី Lao Digital Week 2024 ក្នុងរយៈពេល ៣ថ្ងៃកន្លងមកនេះ គណៈប្រតិភូទាំងអស់ បានធ្វើការចែករំលែកបទពិសោធនៃការធ្វើបរិវត្តកម្មឌីជីថលរបស់ប្រទេសកម្ពុជា ក៏ដូចជាបានសិក្សាពីបទពិសោធរបស់សាធារណរដ្ឋប្រជាធិបតេយ្យប្រជាមានិតឡាវ និងបានជំរុញ និងពង្រឹងកិច្ចសហប្រតិបត្តិការទ្វេភាគីលើវិស័យប្រៃសណីយ៍ ទូរគមនាគមន៍ និង បច្ចេកវិទ្យាគមនាគមន៍និងព័ត៌មាន រវាងប្រទេសទាំងពីរផងដែរ។

រូបភាព 4 សន្លឹក

សូមចុចអាន៖ https://www.facebook.com/share/p/1Lb5nApHGR/