ឯកឧត្តម ឯកអគ្គរាជទូត ណូយ ជំនាញ អញ្ជើញចូលរួមកិច្ចប្រជុំលើកទី១៦ នៃគណៈកម្មាធិការសហប្រតិបត្តិការរួមអាស៊ាន-អូស្ត្រាលី

នៅរសៀលថ្ងៃទី២៦ ខែឧសភា ឆ្នាំ២០២៦ ឯកឧត្តម ណូយ ជំនាញ ឯកអគ្គរាជទូត/តំណាងអចិន្ត្រៃយ៍កម្ពុជាប្រចាំអាស៊ាន បានអញ្ជើញចូលរួមកិច្ចប្រជុំលើកទី១៦ នៃគណៈកម្មាធិការសហប្រតិបត្តិការរួមអាស៊ាន-អូស្ត្រាលី នៅលេខាធិការដ្ឋានអាស៊ាន ដែលមានអូស្ត្រាលីនិងឥណ្ឌូណេស៊ីធ្វើជាសហប្រធាន។ នាពេលកិច្ចប្រជុំ អាស៊ាននិងអូស្ត្រាលី បានពិនិត្យមើលឡើងវិញនូវវឌ្ឍនភាពនៃការអនុវត្តផែនការសកម្មភាពអាស៊ាន-អូស្ត្រាលី (២០២៥-២០២៩) និងទិសដៅនាពេលអនាគតនៃកិច្ចសហប្រតិបត្តិការរវាងភាគីទាំងពីរ។ ភាគីទាំងពីរក៏បានបញ្ជាក់ឡើងវិញអំពីការប្ដេជ្ញាចិត្តក្នុងការធ្វើឱ្យស៊ីជម្រៅបន្ថែមទៀតនូវកិច្ចសហប្រតិបត្តិការជាមួយគ្នា ក្រោមភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-អូស្ត្រាលី ជាពិសេសក្នុងឆ្នាំនេះ ដែលជាឆ្នាំគម្រប់ខួបអនុស្សាវរីយ៍លើកទី៥ នៃភាពជាដៃគូយុទ្ធសាស្ត្រគ្រប់ជ្រុងជ្រោយ អាស៊ាន-អូស្ត្រាលី។

ក្នុងឱកាសនោះ ក្នុងនាមកម្ពុជាជាប្រធានក្រុមការងារគំនិតផ្ដួចផ្ដើមសមាហរណកម្មអាស៊ានក្នុងឆ្នាំនេះ ឯកឧត្តមឯកអគ្គរាជទូត បានថ្លែងអំណរគុណដល់អូស្ត្រាលី ដែលបានចូលរួមចំណែកយ៉ាងសកម្មក្នុងការឈានដល់ការអនុម័តនៃផែនការការងារគំនិតផ្ដួចផ្ដើមសមាហរណកម្មអាស៊ាន ដំណាក់កាលទី៥ (២០២៦-២០៣០)។ ទន្ទឹមនឹងនេះ ឯកឧត្ដមក៏បានក៏បានគូសបញ្ជាក់អំពីសារសំខាន់នៃការបង្កើនកិច្ចសហប្រតិបត្តិការលើវិស័យដែលកំពុងរីកចម្រើន ដូចជាសេដ្ឋកិច្ចឌីជីថល សន្តិសុខអ៊ីនធឺណិត បរិវត្តកម្មថាមពល ភាពធន់នឹងអាកាសធាតុ និងកិច្ចសហប្រតិបត្តិការលម្ហសមុទ្រ ជាដើម។

រូបភាព 2 សន្លឹក

សូមចុចអាន៖ https://go.gov.kh/mptc/mfaic1