គណៈប្រតិភូជាន់ខ្ពស់កម្ពុជា ចូលរួមវគ្គបណ្តុះបណ្តាលភាពជាអ្នកដឹកនាំ និងអភិបាលកិច្ចសាធារណៈ នៅប្រទេសសិង្ហបុរី

សិង្ហបុរី៖ គណៈប្រតិភូជាន់ខ្ពស់កម្ពុជាចំនួន ៣០រូប នៃបណ្តាក្រសួង-ស្ថាប័នរដ្ឋ បានអញ្ជើញចូលរួមក្នុងកម្មវិធីបណ្ដុះបណ្ដាលក្រោមប្រធានបទ «ភាពជាអ្នកដឹកនាំជាយុទ្ធសាស្ត្រ និងអភិបាលកិច្ចសាធារណៈសម្រាប់មន្ត្រីជាន់ខ្ពស់កម្ពុជា (Strategic Leadership and Public Governance for Senior Cambodian Officials)» នៅសាធារណរដ្ឋសិង្ហបុរី រយៈពេល ៥ថ្ងៃ ចាប់ពីថ្ងៃទី២៤ ដល់ថ្ងៃទី២៨ ខែសីហា ឆ្នាំ២០២៦។

កម្មវិធីបណ្តុះបណ្តាលកម្រិតជាន់ខ្ពស់នេះ ត្រូវបានរៀបចំឡើងក្នុងគោលបំណងផ្លាស់ប្តូរ និងចែករំលែកបទពិសោធ ព្រមទាំងឧត្តមានុវត្តន៍របស់ប្រទេសសិង្ហបុរី ពាក់ព័ន្ធនឹងភាពជាអ្នកដឹកនាំក្នុងវិស័យមុខងារសាធារណៈ។ ខ្លឹមសារសំខាន់ៗនៃវគ្គសិក្សានេះ ផ្តោតទៅលើការពង្រឹងសមត្ថភាពដឹកនាំស្ថាប័ន ការអនុវត្តយុទ្ធសាស្ត្រអភិបាលកិច្ចល្អ ការគ្រប់គ្រងនិងវាយតម្លៃសមិទ្ធកម្មការងារ ព្រមទាំងការប្រើប្រាស់បច្ចេកវិទ្យានិងទិន្នន័យ ដើម្បីធ្វើទំនើបកម្មការផ្តល់សេវាសាធារណៈឱ្យកាន់តែមានប្រសិទ្ធភាព និងឆ្លើយតបចំគោលដៅនៃតម្រូវការរបស់ប្រជាពលរដ្ឋ។

+3

រូបភាព 8 សន្លឹក

ទន្ទឹមនឹងការសិក្សាផ្អែកលើទ្រឹស្តី វគ្គបណ្តុះបណ្តាលនេះក៏បានរៀបចំជាវេទិកាពិភាក្សាបើកចំហ ដែលអនុញ្ញាតឱ្យសិក្ខាកាមជាន់ខ្ពស់ទាំងអស់ អាចផ្លាស់ប្តូរទស្សនៈ ចែករំលែកបទពិសោធជាក់ស្តែង និងរួមគ្នាស្វែងរកដំណោះស្រាយនវានុវត្តន៍ ចំពោះបញ្ហាប្រឈមនានាក្នុងការកែទម្រង់ និងដឹកនាំស្ថាប័នរបស់ខ្លួន។

គួររំលេចផងដែរថា ការបញ្ជូនគណៈប្រតិភូទៅបណ្តុះបណ្តាលនៅពេលនេះ គឺជាការបោះជំហានមួយនៃការអនុវត្តផែនការសកម្មភាពឆ្នាំ២០២៦ របស់បណ្តាញអគ្គលេខាធិការនៃក្រសួង-ស្ថាប័នចំណុះអង្គការនីតិប្រតិបត្តិ ក្នុងចក្ខុវិស័យពង្រឹង និងអភិវឌ្ឍសមត្ថភាពថ្នាក់ដឹកនាំរដ្ឋបាលសាធារណៈកម្ពុជា ឱ្យកាន់តែមានភាពមុតស្រួច និងប្រកបដោយប្រសិទ្ធភាពខ្ពស់៕

សូមចុចអាន៖ https://www.facebook.com/share/p/1CPQxeMKH4/