ថ្ងៃទី២៥ មេសា ២០២៦
កិច្ចប្រជុំក្រុមប្រឹក្សាភិបាលនៃមជ្ឈមណ្ឌលបច្ចេកវិទ្យាផលិតកម្មឌីជីថល កម្ពុជា-ជប៉ុន (CJDM)
រាជធានីភ្នំពេញ៖ នារសៀលថ្ងៃទី២៤ ខែមេសា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានដឹកនាំកិច្ចប្រជុំក្រុមប្រឹក្សាភិបាលនៃមជ្ឈមណ្ឌលបច្ចេកវិទ្យាផលិតកម្មឌីជីថល កម្ពុជា-ជប៉ុន (CJDM) ដោយមានការអញ្ជើញចូលរួមពីសំណាក់ ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា និងជាប្រធានក្រុមប្រឹក្សាភិបាល CJDM, លោក Jun Arii អនុប្រធានក្រុមប្រឹក្សាភិបាល CJDM ព្រមទាំងសមាជិក សមាជិកា នៃក្រុមប្រឹក្សាភិបាល និងថ្នាក់ដឹកនាំពាក់ព័ន្ធជាច្រើនរូបទៀត។
ក្នុងឱកាសនេះ នាយកប្រតិបត្តិ CJDM បានបង្ហាញរបាយការណ៍អំពីវឌ្ឍនភាព និងសមិទ្ធផលសំខាន់ៗក្នុងរយៈពេលពីរឆ្នាំចុងក្រោយ (២០២៤–២០២៦)។ ការបង្ហាញនេះក៏បានលើកឡើងពីអាទិភាពយុទ្ធសាស្ត្រ និងផែនការសកម្មភាពសំខាន់ៗ ដើម្បីពង្រឹងសមត្ថភាពស្ថាប័ន និងធានាដំណើរការប្រកបដោយប្រសិទ្ធភាព និងរលូននាពេលអនាគត។
រូបភាព 9 សន្លឹក
បន្ទាប់ពីស្ដាប់របាយការណ៍ និងកិច្ចពិភាក្សាផ្លាស់ប្ដូរមតិយោបល់រួចមក ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលជប៉ុន ដែលបានផ្ដល់នូវគ្រឿងចក្របច្ចេកវិទ្យាកម្រិតខ្ពស់ និងការគាំទ្រផ្នែកបច្ចេកទេសដល់ CJDM ដែលជាកាតាលីករដ៏សំខាន់ក្នុងការជំរុញបដិវត្តន៍ឧស្សាហកម្ម ៤.០ នៅកម្ពុជា។ ដើម្បីបន្តពង្រឹងសមត្ថភាពស្ថាប័ន ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្ដល់អនុសាសន៍ឱ្យពង្រឹងការផ្ដល់សេវាកម្មដល់ដៃគូធុរកិច្ចឱ្យកាន់តែចំគោលដៅ ជាពិសេសលើការប្រតិបត្តិការ និងការជួសជុលគ្រឿងបង្គុំម៉ាស៊ីនស្របតាមការស្វែងរកអតិថិជនជាក់លាក់ និងផលិតផលដែលមានសក្ដានុពលទីផ្សារខ្ពស់ (Niche Products)។ ទន្ទឹមនឹងនេះ ការបណ្ដុះបណ្ដាលគ្រូបង្គោលដោយជ្រើសរើសចេញពីសាស្ត្រាចារ្យ និងនិស្សិតដែលមានសមត្ថភាពខ្ពស់ គឺជាអាទិភាពមិនអាចខ្វះបាន ដើម្បីធានាបាននូវការផ្ទេរចំណេះដឹងបច្ចេកទេសទៅក្នុងកម្មវិធីសិក្សាជាក់ស្ដែងនៅតាមគ្រឹះស្ថានសិក្សាឱ្យមានប្រសិទ្ធភាព និងចីរភាព។ ក្នុងន័យនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ជឿជាក់ថា តាមរយៈកិច្ចសហការយ៉ាងជិតស្និទ្ធរវាងរដ្ឋ វិស័យអប់រំ និងឧស្សាហកម្ម ព្រមទាំងការគាំទ្រពីដៃគូអន្តរជាតិ CJDM នឹងក្លាយជាកម្លាំងចលករយ៉ាងសំខាន់ក្នុងការបណ្ដុះបណ្ដាលធនធានមនុស្សកម្រិតខ្ពស់ ដើម្បីឆ្លើយតបទៅនឹងតម្រូវការនៃសេដ្ឋកិច្ចឌីជីថល និងការរីកចម្រើននៃឧស្សាហកម្មកម្ពុជានាពេលអនាគត។
នៅចុងបញ្ចប់នៃកិច្ចប្រជុំ តំណាង CJDM បានប្រគល់ជូន ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី នូវឧបករណ៍ភ្លេង “ចាប៉ីដងវែង” ដែលបានផលិតដោយក្រុមការងារ CJDM ដោយផ្ទាល់ ដែលជានិមិត្តរូបនៃការគោរព និងកោតសរសើរដ៏ជ្រាលជ្រៅ ចំពោះវប្បធម៌ខ្មែរ និងក្រសួងអប់រំ យុវជន និងកីឡា ដែលតែងបន្តយកចិត្តទុកដាក់សម្របសម្រួលរាល់កិច្ចសហប្រតិបត្តិការជាមួយ CJDM និងភាគីពាក់ព័ន្ធ៕
សូមចុចអាន៖ https://www.facebook.com/share/p/19TwRJjsvL/
