ឯកឧត្តមអគ្គលេខាធិការរង ជាង វុត្ថា បានអញ្ជើញធ្វើបទបង្ហាញអំពីថ្នាលផ្ទៀងផ្ទាត់ឯកសារ verify.gov.kh ក្នុងសិក្ខាសាលា “ASEAN Workshop on Cross-Border Digital Identity and Verifiable Credentials”

រាជធានីភ្នំពេញ៖ នាព្រឹកថ្ងៃទី១៨ ខែសីហា ឆ្នាំ២០២៦ ឯកឧត្តម ជាង វុត្ថា អគ្គលេខាធិការរង នៃអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល (គ.រ.ឌ.) បានអញ្ជើញធ្វើបទបង្ហាញអំពីថ្នាលផ្ទៀងផ្ទាត់ឯកសារផ្លូវការរបស់រាជរដ្ឋាភិបាលកម្ពុជា verify.gov.kh នៅក្នុងសិក្ខាសាលាអាស៊ានស្តីពីអត្តសញ្ញាណឌីជីថលឆ្លងដែន និងលិខិតសម្គាល់ដែលអាចផ្ទៀងផ្ទាត់បាន (ASEAN Workshop on Cross-Border Digital Identity and Verifiable Credentials) តាមប្រព័ន្ធអនទ្បាញ ដោយមានការអញ្ជើញចូលរួមពីតំណាងមកពីបណ្ដាប្រទេសជាសមាជិកអាស៊ាន លេខាធិការដ្ឋានអាស៊ាន ដៃគូអភិវឌ្ឍន៍ និងអ្នកជំនាញបច្ចេកទេសជាច្រើនរូប។

តាមរយៈការចែករំលែកអំពីបទពិសោធន៍និងសមិទ្ធផលដែលកម្ពុជាទទួលបានតាមរយៈថ្នាល verify.gov.kh នេះ បានបង្ហាញយ៉ាងច្បាស់ពីការបេ្តជ្ញាចិត្តរបស់កម្ពុជាក្នុងការតភ្ជាប់ហេដ្ឋារចនាសម្ព័ន្ធឌីជីថលសាធារណៈ (DPI) ជាមួយប្រទេសជាសមាជិកអាស៊ានក្នុងតំបន់និងភាគីពាក់ព័ន្ធ ដែលកំពុងដើរតួយ៉ាងសំខាន់ក្នុងការរៀបចំក្របខណ្ឌតំបន់អាស៊ាន ដើម្បីធ្វើឱ្យប្រព័ន្ធអត្តសញ្ញាណ និងការផ្ទៀងផ្ទាត់ឯកសារឌីជីថលរវាងបណ្តាប្រទេសជាសមាជិកអាស៊ានអាចដំណើរការជាមួយគ្នាបានដោយរលូន និងមានសុវត្ថិភាពខ្ពស់។

រូបភាព 3 សន្លឹក

ថ្នាលផ្ទៀងផ្ទាត់ឯកសារ Verify.gov ជាសសរស្ដម្ភហេដ្ឋារចនាសម្ព័ន្ធទី ៤ នៅក្នុងក្របខណ្ឌកាត់បន្ថយការប្រើប្រាស់ក្រដាស ដែលនឹងជួយសម្រួលដល់ប្រតិបត្តិការឌីជីថលឆ្លងដែន គាំទ្រដល់ការធ្វើពាណិជ្ជកម្ម បើកផ្លូវឱ្យមានការផ្លាស់ប្តូរកម្លាំងពលកម្ម និងធានាបាននូវការផ្តល់សេវាសាធារណៈក្នុងវិស័យរដ្ឋនិងឯកជនប្រកបដោយទំនុកចិត្ត។

សូមចុចអាន៖ https://www.facebook.com/share/p/1JbUcWpD1w/