ក្រសួងសាធារណការ និងដឹកជញ្ជូន រៀបចំវគ្គបណ្តុះបណ្តាល ចំនួន ២រួមគ្នា ស្ដីពី ១. ការគ្រប់គ្រង និងភាពជាអ្នកដឹកនាំ និងការងារបច្ចេកវិទ្យាឌីជីថល និង ២. ការគ្រប់គ្រងស្ថាប័ន និងគោលការណ៍ណែនាំលើនីតិវិធី និងបែបបទ ស្តីពីការដំឡើងឋានន្តរស័ក្តិ និងថា្នក់ជូនមន្ត្រីរាជការស៊ីវិល

ទីស្តីការក្រសួង៖ នារសៀលថ្ងៃព្រហស្បតិ៍ ទី៤ ខែកញ្ញា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកវគ្គបណ្តុះបណ្តាល ចំនួន ២វគ្គរួមគ្នា ស្ដីពី៖ ១-ការគ្រប់គ្រង និងភាពជាអ្នកដឹកនាំ និងការងារបច្ចេកវិទ្យាឌីជីថល ២-ការគ្រប់គ្រងស្ថាប័ន និងគោលការណ៍ណែនាំលើនីតិវិធី និងបែបបទ ស្តីពីការដំឡើងឋានន្តរស័ក្តិ និងថា្នក់ជូនមន្ត្រីរាជការស៊ីវិល ដោយមានការចូលរួមពី ឯកឧត្តម លោកជំទាវ ជាថ្នាក់ដឹកនាំក្រសួង អង្គភាពថ្នាក់ជាតិ មន្ទីរសាធារណការ និងដឹកជញ្ជូនរាជធានីខេត្ត និងមន្រ្តីជំនាញ នៃអង្គភាពក្រោមឱវាទក្រសួងជាច្រើនរូបទៀត។

វគ្គបណ្តុះបណ្តាលនេះមានគោលបំណងពង្រឹងសមត្ថភាពមន្ត្រីរាជការក្រសួង ឱ្យមានការយល់ដឹងកាន់តែទូលំទូលាយក្នុងការបំពេញការងារប្រកប ដោយប្រសិទ្ធភាពខ្ពស់ជូនក្រសួង ដើម្បីអភិវឌ្ឍបន្ថែមនូវភាពជាអ្នកដឹកនាំ និងសមត្ថភាពច្នៃប្រឌិតរបស់ថ្នាក់ដឹកនាំ និងមន្ត្រីរាជការស៊ីវិល លើកកម្ពស់ការអនុវត្តរបៀបវារៈកំណែទម្រង់វិស័យសាធារណៈសំខាន់ៗរបស់រាជរដ្ឋាភិបាល ជំរុញការធ្វើទំនើបកម្មសា្ថប័នរដ្ឋ ប្រែក្លាយរដ្ឋបាលសាធារណៈជារដ្ឋបាលទំនើប ប្រកបដោយសមត្ថភាពខ្ពស់ ខ្លាំង ឆ្លាតវៃ និងស្អាតស្អំ ដើម្បីផលប្រយោជន៍ជូនប្រជាពលរដ្ឋ និងជាពិសេសការជំរុញលើកទឹកចិត្ដមន្ត្រីរាជការយើង ឱ្យមានភាពសកម្ម ស្វាហាប់ មោះមុត និងមានការតាំងចិត្តខ្ពស់ក្នុងកិច្ចការគ្រប់គ្រងដឹកនាំនៅក្នុងផ្នែក និងជំនាញនីមួយៗ និងការបំពេញតួនាទីភារកិច្ចស្នូល របស់ក្រសួងឱ្យសម្រេចបាននូវផ្លែផ្កា និងសមិទ្ធផលថ្មីៗបន្ថែមទៀត។

រូបភាព 4 សន្លឹក

ថ្លែងទៅកាន់អង្គពិធីទាំងមូល ឯកឧត្តមរដ្ឋមន្រ្តី បានគូសបញ្ជាក់ពីការអភិវឌ្ឍធនធានមនុស្ស និងមូលធនមនុស្ស ក្នុងការបង្កើនប្រសិទ្ធភាពការងារ និងការរីកចម្រើនរបស់ស្ថាប័ន ដែលតម្រូវឱ្យការចាំបាច់ត្រូវឆ្លងកាត់ការបណ្តុះបណ្តាល អភិវឌ្ឍ ផ្តល់ឱកាស និងការប្រកួតប្រជែង។ ទន្ទឹមនឹងនេះ ធនធានមនុស្សអាចអភិវឌ្ឍទៅជាមូលធនមនុស្សបាន គឺត្រូវការពេលវេលា ទើបអាចទទួលបានបំណិនជីវិត សមត្ថភាពបំពេញការងារប្រកបដោយប្រសិទ្ធភាព និងការប្រកួតប្រជែង ហេតុដូច្នេះហើយទើបយើងត្រូវធ្វើការបណ្តុះបណ្តាលថ្មីៗបន្ថែមដល់មន្ត្រីរាជការរបស់យើងឱ្យមានគុណភាព ក្លាយជាមូលធនមនុស្ស ដើម្បីចូលរួមបំពេញភារកិច្ចជូនជាតិមាតុភូមិ ឱ្យសម្រេចជោគជ័យបន្ថែមទៀត។

ឯកឧត្តមរដ្ឋមន្រ្តី បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ ឯកឧត្តម លោកជំទាវ ជាថ្នាក់ដឹកនាំ ថ្នាក់ដឹកនាំនៃអគ្គនាយកដ្ឋានរដ្ឋបាល និងហិរញ្ញវត្ថុ និងនាយកដ្ឋាន ក្រោមឱវាទ រួមទាំងវាគ្មិនកិត្តិយស និងគ្រូឧទ្ទេសទាំងអស់ ដែលបានផ្តល់កិច្ចសហការយ៉ាងល្អ ប្រសើរក្នុងការគាំទ្រ និងសម្របសម្រួលដល់ដំណើរការរៀបចំវគ្គបណ្តុះបណ្តាលនាពេលនេះ។ ខ្ញុំក៏សូមស្នើដល់សិក្ខាកាម សូមបន្តចែករំលែកចំណេះដឹងដែលទទួលបានពីវគ្គបណ្តុះបណ្តាលនេះ ជូនដល់មន្ត្រីផ្សេងៗនៅតាមបណ្តាអង្គភាពឱ្យបានយល់ដឹងផងដែរ។

គូសបញ្ជាក់ផងដែរថា រាជរដ្ឋាភិបាល នីតិកាលទី៧នៃរដ្ឋសភា ក្រោមការដឹកនាំ ដ៏ស្វាហាប់ និងឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃ ព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណ-ដំណាក់កាលទី១ ក្នុងនោះ នៅត្រង់បញ្ចកោណទី១ បានកំណត់យក “ការអភិវឌ្ឍមូលធនមនុស្ស” គឺជាអាទិភាព និងជាលក្ខខណ្ឌចាំបាច់មិនអាចខ្វះបានសម្រាប់ជំរុញពិពិធកម្ម និងកំណើនសេដ្ឋកិច្ចប្រកប ដោយបរិយាបន្ន ភាពធន់ និងវិបុលភាព ដើម្បីសម្រេចនូវចក្ខុវិស័យប្រែក្លាយកម្ពុជាជាប្រទេស មានចំណូលខ្ពស់នៅឆ្នាំ២០៥០៕

សូមចុចអាន៖ https://www.facebook.com/share/p/18cGfhqmfu/