ថ្ងៃទី១៥ មិថុនា ២០២៥
វេទិកាអន្តរជាតិស្តីពី "ការវិនិយោគ និងការសាងសង់ហេដ្ឋារចនាសម្ព័ន្ធលើកទី១៦" ក្នុងមូលបទ “ឆ្ពោះទៅកាន់ឌីជីថលបៃតង និងភាពវៃឆ្លាត កិច្ចសហប្រតិបត្តិការក្នុងភាពឈ្នះ-ឈ្នះ លើការផ្តល់ហិរញ្ញវត្ថុ”
ទីក្រុងម៉ាកាវ ៖ ចាប់ពីថ្ងៃទី១០-១២ ខែ មិថុនា ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំគណ:ប្រតិភូក្រសួង ចូលរួមវេទិកាអន្តរជាតិស្តីពី "ការវិនិយោគនិងការសាងសង់ហេដ្ឋារចនាសម្ព័ន្ធលើកទី១៦" នៅទីក្រុងម៉ាកាវ នៃសាធារណរដ្ឋប្រជាមានិតចិន "The 16th International Infrastructure Investment and Construction Forum (16th IIICF)" ក្នុងមូលបទ “ឆ្ពោះទៅកាន់ឌីជីថលបៃតង និងភាពវៃឆ្លាត កិច្ចសហប្រតិបត្តិការក្នុងភាពឈ្នះ-ឈ្នះលើការផ្តល់ហិរញ្ញវត្ថុ” ដោយមាការអញ្ជើញអមដំណើរពី ឯកឧត្តមអនុរដ្ឋលេខាធិការ និងឯកឧត្តមអគ្គនាយក ព្រមទាំងមានអ្នកចូលរួមប្រមាណជាង ២០០០នាក់ ដែលជាតំណាងពីប្រទេសជាង៧០ ជារៀងរាល់ឆ្នាំ។
វេទិកានេះរៀបចំឡើងក្នុងគោលបំណងចែករំលែកនូវចំណេះដឹង រៀបចំកសាង និងប្រមូលមតិយោបល់ស្ថាបនានានាពីមន្ត្រីជាន់ខ្ពស់តំណាង ក្រសួង-ស្ថាប័ន អ្នកជំនាញមានបទពិសោធន៍ខ្ពស់ៗ ក្នុងឧស្សាហកម្មឈានមុខផងដែរ។
រូបភាព 6 សន្លឹក
នាឱកាសនោះ ឯកឧត្តមរដ្ឋលេខាធិការ ក៏ត្រូវបានផ្តល់ជាកិត្តិយសអញ្ជើញឡើងថ្លែងសង្កថាគន្លឹះ ស្តីពី "China-Cambodia Infrastructures Connectivity" ដែលរួមមាន ៖ ១).មូលដ្ឋានគ្រឹះកិច្ចសហការកម្ពុជា-ចិន លើហេដ្ឋារចនាសម្ព័ន្ធ ដោយរំលេចពីគំនិតផ្តួចផ្តើមខ្សែក្រវាត់ និងផ្លូវ (Belt and Road Initiative) ២). គម្រោងដែលបានធ្វើឱ្យកម្ពុជាមានការផ្លាស់ប្តូរប្រែប្រួលមុខមាត់ លើកកម្ពស់ជីវភាព បរិស្ថានរបស់ប្រជាពលរដ្ឋ ដូចជា គម្រោងផ្លូវល្បឿនលឿនភ្នំពេញ-ព្រះសីហនុ គម្រោងផ្លូវល្បឿនលឿនភ្នំពេញ-បាវិត គម្រោងព្រែកជីកហ្វូណនតេជោ និងគម្រោងកែលម្អបរិស្ថាន និងលើកកម្ពស់អនាម័យក្រុងមួយចំនួនផងដែរ៕
សូមចុចអាន៖
