ក្រសួងសុខាភិបាលបានជួបប្រជុំពិភាក្សាជាមួយក្រុមហ៊ុនមិត្តហ្វូន (Metfone) ដើម្បីពង្រឹងកិច្ចសហការលើការធ្វើបរិវត្តកម្មឌីជីថល តាមរយៈការរៀបចំប្រព័ន្ធគ្រប់គ្រងមន្ទីរពេទ្យឆ្លាតវៃ និងប្រព័ន្ធគ្រប់គ្រងការបញ្ជូនអ្នកជំងឺសង្គ្រោះបន្ទាន់ឱ្យកាន់តែមានប្រសិទ្ធភាព

រាជធានីភ្នំពេញ៖ នាព្រឹកថ្ងៃពុធ ១២រោច ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១១ ខែតុលា ឆ្នាំ២០២៣ វេលាម៉ោង ១០:០០ នាទី នៅទីស្តីការក្រសួងសុខាភិបាល ឯកឧត្តមវេជ្ជបណ្ឌិត ឡូ វាសនាគីរី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងក្រុមការងារក្រសួងសុខាភិបាល បានជួបប្រជុំជាមួយតំណាងក្រុមហ៊ុន វៀតធេល កម្ពុជាភីធីអ៊ី ហៅកាត់ មិត្តហ្វូន។

ស្ថិតក្នុងបរិបទបច្ចេកវិទ្យា និងនវានុវត្តន៍ឈានមុខ កិច្ចប្រជុំពិភាក្សានេះបានផ្ដោតលើ «បរិវត្តកម្មឌីជីថល» (Digital Transformation) ក្នុងវិស័យសុខាភិបាល ដែលមានចំណុចសំខាន់ៗទៅលើ៖ ១) Smart Hospital Management System និង ២) Emergency Management System (Ambulance Referral System) ។

រូបភាព 3 សន្លឹក

ក្នុងឱកាសនេះដែរ ឯកឧត្តមរដ្ឋលេខាធិការ បានគូសបញ្ជាក់ពីផ្នែកគន្លឹះៗដែលក្រសួងសុខាភិបាលបាន និងកំពុងអនុវត្ត ពិសេសការកសាងភាពជាដៃគូជាមួយដៃគូសុខាភិបាល រួមទាំងវិស័យឯកជន និងការផ្តោតលើដំណោះស្រាយសុខាភិបាលឌីជីថល ដែលស្របនិងគោលនយោបាយ អាទិភាព និងយុទ្ធសាស្រ្តបញ្ចកោណរបស់រាជរដ្ឋាភិបាល នីតិកាលទី៧នៃរដ្ឋសភា។ ឯកឧត្តមក៏បានលើកឡើងផងដែរនូវ ស្ថានភាពបច្ចុប្បន្ននៃការងារពាក់ព័ន្ធនិងឌីជីថលក្នុងវិស័យសុខាភិបាល និងចំណុចសំខាន់ៗដែលត្រូវយកចិត្តទុកដាក់សម្រាប់ការងារសុខាភិបាលឌីជីថលនេះ ដើម្បីឱ្យការគ្រប់គ្រង និងការបម្រើសេវាសុខាភិបាលកាន់តែប្រសើរឡើង ប្រកបដោយគុណភាព។

ជាការឆ្លើយតប តំណាងក្រុមហ៊ុន បានបង្ហាញជូនពីបទពិសោធន៍ការងារដែលបានជួយក្រសួងសុខាភិបាលនៅប្រទេសវៀតណាម ពិសេសការងារទាក់ទងនិងប្រព័ន្ធគ្រប់គ្រងមន្ទីរពេទ្យ និងប្រព័ន្ធគ្រប់គ្រងសង្រ្គោះបន្ទាន់ (ប្រព័ន្ធបញ្ជូនតាមរថយន្តគិលានសង្រ្គោះ)។

គួរបញ្ជាក់ផងដែរថាកិច្ចប្រជុំនេះ មានការអញ្ជើញចូលរួមពី ថ្នាក់ដឹកនាំអង្គភាពថ្នាក់កណ្តាលក្រសួងសុខាភិបាល នាយកដ្ឋានពាក់ព័ន្ធ តំណាងមន្ទីរពេទ្យកាល់ម៉ែត និងថ្នាក់ដឹកនាំ ព្រមទាំងបុគ្គលិកក្រុមហ៊ុន វៀតធេល កម្ពុជាភីធីអ៊ី ហៅកាត់ មិត្តហ្វូន។

សូមចុចអាន៖ https://t.me/MOHCambodia/2497