ថ្ងៃទី៨ កញ្ញា ២០២៦
កម្មវិធី CoolThink@JC របស់ហុងកុង ចូលរួមសហការបណ្ដុះធនធានវ័យក្មេងកម្ពុជាក្នុងវិស័យបច្ចេកវិទ្យាឌីជីថល
ទីក្រុងហុងកុង៖ លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា បានដឹកនាំប្រតិភូ និងតំណាងគ្រូបង្រៀនកម្ពុជា ធ្វើទស្សនកិច្ចសិក្សា និងផ្លាស់ប្តូរបទពិសោធន៍ស្តីពី “កម្មវិធីការគិតបែបកុំព្យូទ័រ (CoolThink@JC)” នៅទីក្រុងហុងកុង ដោយមានការចូលរួមពីតំណាងប្រទេសចិន និងទីក្រុងហុងកុង។ កម្មវិធីនេះជាផ្នែកមួយនៃកំណែទម្រង់ការអប់រំ STEM និងឌីជីថលដើម្បីឆ្លើយតបទៅនឹងគោលនយោបាយរាជរដ្ឋាភិបាលក្នុងការអភិវឌ្ឍធនធានមនុស្សសម្រាប់សេដ្ឋកិច្ច និងសង្គមឌីជីថល។
ការធ្វើទស្សនកិច្ចនេះបានប្រព្រឹត្តទៅ បន្ទាប់ពីនាយកដ្ឋានបរិវត្តកម្មឌីជីថល ក្រសួងអប់រំ យុវជន និងកីឡា បានចុះអនុស្សរណៈនៃការយោគយល់ជាផ្លូវការជាមួយ មូលនិធិក្លឹបសប្បុរសធម៌ទីក្រុងហុងកុង (The Hong Kong Jockey Club Charities Trust) កាលពីថ្ងៃទី១៨ ខែមិថុនា ឆ្នាំ២០២៥ កន្លងទៅ ដើម្បីនាំយកកម្មវិធី CoolThink@JC មកអនុវត្តក្នុងប្រព័ន្ធអប់រំនៅកម្ពុជា។
រូបភាព 15 សន្លឹក
ក្នុងដំណើរទស្សនកិច្ចនេះ លោកជំទាវបណ្ឌិតបានដឹកនាំគណៈប្រតិភូកម្ពុជា ចុះសិក្សាស្វែងយល់ផ្ទាល់នៅសាលារៀនចំនួន២គឺ The Salvation Army Tin Ka Ping School និង Ying Wa Primary School and Ying Wa College ដើម្បីសិក្សាពីការអនុវត្តជាក់ស្តែង តាមរយៈបទបង្ហាញចែករំលែកបទពិសោធន៍ និងភាពជោគជ័យរបស់សាលាទាំង២ ក្នុងការអនុវត្ត កម្មវិធីការគិតបែបកុំព្យូទ័រ (CoolThink@JC) នៅកម្រិតបឋមសិក្សា និងវិទ្យាល័យក្នុងទីក្រុងហុងកុង។ ក្នុងសិក្ខាសាលានេះ ក៏មានការចែករំលែកបទពិសោធន៍ពីគ្រូបង្រៀន និងគណៈគ្រប់គ្រងសាលារបស់កម្ពុជាអំពីលទ្ធផល និងបទពិសោធន៍នៃការអនុវត្តកម្មវិធីនេះក្នុងដំណាក់កាលទី១។ ក្នុងឱកាសនោះក៏មានការពិភាក្សាលើកទិសដៅការងារបន្តដើម្បីធានាបាននូវឱ្យការអនុវត្តកម្មវិធីប្រកបដោយជោគជ័យ និងនិរន្តរភាព។
ក្រោមកិច្ចសហការនេះ នាយកដ្ឋានបរិវត្តកម្មឌីជីថល ក្រសួងអប់រំ យុវជន និងកីឡា ក៏ទទួលបានការឧបត្ថម្ភនូវសម្ភារៈឌីជីថលពីស្ថាប័នឯកជននៅទីក្រុងហុងកុង ដើម្បីគាំទ្រការអនុវត្តកម្មវិធីការគិតបែបកុំព្យូទ័រនៅកម្ពុជា ទទួលបានជោគជ័យប្រកបដោយគុណភាពបរិយាបន្ន។
ការផ្លាស់ប្តូរបទពិសោធន៍នេះ គឺជាជំហានដ៏សំខាន់មួយក្នុងការលើកកម្ពស់សមត្ថភាពគ្រូបង្រៀន ពង្រឹងវិធីសាស្ត្របង្រៀនបែបឌីជីថល និងបំពាក់បំប៉នជំនាញការគិតចាប់ពីកម្រិតបឋមសិក្សាដែលជាគ្រឹះយ៉ាងរឹងមាំក្នុងការរៀបចំធនធានមនុស្សកម្ពុជា ដើម្បីឈានទៅសិក្សាកម្មវិធី បច្ចេកវិទ្យាកម្រិតថ្មី។
កម្មវិធី CoolThink@JC មានសក្ដានុពលក្នុងការបណ្តុះបណ្តាលសិស្សឱ្យចេះបំបែកបញ្ហា សង្កេតរកលំនាំ និងរៀបចំលំដាប់វិធីដោះស្រាយប្រកបដោយតក្កវិជ្ជា ដោយប្រែក្លាយកុមារពីអ្នកប្រើប្រាស់បច្ចេកវិទ្យាទៅជាអ្នកបង្កើតនវានុវត្តន៍ឌីជីថល។ តាមរយៈកម្មវិធីនេះ វិធីសាស្ត្របង្រៀនត្រូវបានផ្លាស់ប្តូរពីការរៀនកុំព្យូទ័រមូលដ្ឋានមកជាការរៀនតាមបែបគម្រោង ខណៈដែលគ្រូបង្រៀនបានផ្លាស់ប្តូរតួនាទីមកធ្វើជាអ្នកសម្របសម្រួល ដឹកនាំការពិភាក្សា និងជួយសិស្សក្នុងការសាកល្បងកែតម្រូវកំហុស ជំរុញប្រសិទ្ធភាពក្នុងការអប់រំកាន់តែប្រសើរ។
ការនាំយកកម្មវិធីសិក្សាកម្រិតអន្តរជាតិមកអនុវត្តក្នុងសាលារៀនសាធារណៈ នឹង ចូលរួមចំណែកយ៉ាងសំខាន់ក្នុងការកាត់បន្ថយគម្លាតឌីជីថល លើកកម្ពស់សមធម៌ និងបរិយាបន្ន។
សូមចុចអាន៖ https://www.facebook.com/share/p/1FdVFAD8Ad/
