កិច្ចប្រជុំវឌ្ឍនភាពការងារផ្សារពាណិជ្ជកម្មតាមប្រព័ន្ធអេឡិចត្រូនិក ខេមបូឌាត្រេដ (CambodiaTrade.com) និងគម្រោងពង្រឹងពាណិជ្ជកម្មអេឡិចត្រូនិកជនបទ (Rural E-commerce Empowerment Project - REEP)

(ភ្នំពេញ)៖ នាព្រឹកថ្ងៃអង្គារ ទី២៦ ខែឧសភា ឆ្នាំ២០២៦ នៅទីស្ដីការក្រសួងពាណិជ្ជកម្ម លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានអញ្ជើញដឹកនាំកិច្ចប្រជុំពិនិត្យ និងវាយតម្លៃលើវឌ្ឍនភាពការងាររបស់ផ្សារពាណិជ្ជកម្មតាមប្រព័ន្ធអេឡិចត្រូនិក ខេមបូឌាត្រេដ (CambodiaTrade.com) និងគម្រោងពង្រឹងពាណិជ្ជកម្មអេឡិចត្រូនិកជនបទ (Rural E-commerce Empowerment Project - REEP) ដែលមានវត្តមានអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក និងលោក លោកស្រី ជាមន្ត្រីជំនាញពាក់ព័ន្ធជាច្រើនរូប។

សូមជម្រាបជូនថា ផ្សារពាណិជ្ជកម្ម CambodiaTrade.com គឺជាគំនិតផ្ដួចផ្ដើមដ៏សំខាន់របស់ក្រសួងពាណិជ្ជកម្ម ក្នុងគោលបំណងលើកកម្ពស់ផលិតផលក្នុងស្រុក និងផ្ដល់វេទិកាឌីជីថលប្រកបដោយទំនុកចិត្តសម្រាប់ធុរជនកម្ពុជា។

រូបភាព 4 សន្លឹក

បន្ថែមពីនេះ ថ្នាលនេះនឹងបង្កើតជាឱកាសសម្រាប់កសិករ-ផលិតករនៅតាមទីជនបទ អាចដាក់លក់ផលិតផលរបស់ពួកគាត់នៅក្នុងថ្នាលនេះបាន ហើយថ្នាលនេះនឹងជួយជំរុញឱ្យពួកគាត់មានការអភិវឌ្ឍទំនិញទាំងនោះប្រកបដោយស្ដង់ដា អនាម័យ និងគុណភាពខ្ពស់ ព្រមទាំងផ្ដល់ជាវគ្គបណ្តុះបណ្តាលបន្ថែមទាក់ទងបច្ចេកទេស និងការវេចខ្ចប់ជាដើម។

ដោយឡែក គម្រោង REEP នឹងដើរតួយ៉ាងសំខាន់ក្នុងការបណ្ដុះបណ្ដាល និងពង្រឹងសមត្ថភាពពាណិជ្ជកម្មតាមប្រព័ន្ធអេឡិចត្រូនិកដល់អាជីវករនៅតាមតំបន់ជនបទ ដើម្បីធានាថា "គ្មាននរណាម្នាក់ត្រូវបានបោះបង់ចោលក្នុងសេដ្ឋកិច្ចឌីជីថល" ផងដែរ៕

សូមចុចអាន៖ https://www.facebook.com/share/p/1CxD5UBWpf/