ជំនួបសម្ដែងការគួរសម និងសំណេះសំណាលជាមួយក្រុមនិស្សិតជ័យលាភីអាហារូបករណ៍រដ្ឋាភិបាលបារាំង (Bourse France Excellence) សហភាពអឺរ៉ុប (EU-AFD) និងមូលនិធិ Pierre Fabre

រាជធានីភ្នំពេញ៖ នារសៀលថ្ងៃទី១៥ ខែកញ្ញា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានទទួលជួបសម្ដែងការគួរសម និងសំណេះសំណាលជាមួយក្រុមនិស្សិតជ័យលាភីអាហារូបករណ៍រដ្ឋាភិបាលបារាំង (Bourse France Excellence), សហភាពអឺរ៉ុប (EU-AFD) និងមូលនិធិ Pierre Fabre ចំនួន ១៣នាក់ សម្រាប់ឆ្នាំសិក្សា ២០២៦-២០២៧ ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា ព្រមទាំងភាគីពាក់ព័ន្ធ។

ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បាននាំយកនូវការអបអរសាទរពីសំណាក់ សម្តេចមហាបវរធិបតី នាយករដ្ឋមន្ត្រី ជូនចំពោះនិស្សិតជ័យលាភីទាំងអស់ ដោយបានគូសបញ្ជាក់នូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងសិក្សារៀនសូត្ររបស់និស្សិត ដែលទទួលបានអាហារូបករណ៍ដ៏មានតម្លៃនេះ ដើម្បីទៅបន្តការសិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតនៅប្រទេសបារាំងនាពេលខាងមុខ។ ជាមួយគ្នានេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍ដល់និស្សិតទាំងអស់ ឱ្យយកចិត្តទុកដាក់ខិតខំប្រឹងប្រែងរៀនសូត្រ និងថែរក្សាសុខភាពឱ្យបានរឹងមាំ ដោយត្រូវត្រៀមសម្របខ្លួននឹងអាកាសធាតុត្រជាក់ ជាពិសេសត្រូវចេះបត់បែន និងរៀបចំខ្លួនឱ្យបានល្អប្រសើរ ទាំងផ្នែកស្មារតី និងកាយសម្បទា រក្សាវិន័យ ព្រមទាំងដើរតួជាតំណាងមុខមាត់ប្រទេសជាតិនៅលើឆាកអន្តរជាតិ ដើម្បីទទួលបានលទ្ធផលល្អប្រសើរក្នុងការសិក្សា និងនាំយកចំណេះដឹង ជំនាញ ត្រឡប់មកចូលរួមចំណែកអភិវឌ្ឍប្រទេសជាតិវិញ។

រូបភាព 5 សន្លឹក

បន្ថែមពីនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងពីវឌ្ឍនភាពថ្មីៗនៃទំនាក់ទំនងកិច្ចសហប្រតិបត្តិការលើវិស័យអប់រំ រវាងកម្ពុជា និងបណ្ដាប្រទេសនានាក្នុងសហភាពអឺរ៉ុប ជាពិសេសកម្រិតឧត្តមសិក្សា និងបានសាកសួរពីបទពិសោធរបស់និស្សិតពាក់ព័ន្ធនឹងការប្រើប្រាស់ប្រព័ន្ធបញ្ញាសិប្បនិម្មិត (AI) ជាជំនួយដល់ការសិក្សា ព្រមទាំងបានណែនាំឱ្យនិស្សិតទាំងអស់ប្រើប្រាស់ AI ប្រកបដោយទំនួលខុសត្រូវ និងភាពឆ្លាតវៃ ដោយមិនត្រូវពឹងផ្អែកលើ AI ទាំងស្រុងនោះទេ ដើម្បីរក្សាឱ្យបាននូវសមត្ថភាពស្វ័យសិក្សា ការត្រិះរិះពិចារណា និងការវិភាគស៊ីជម្រៅ ព្រមទាំងត្រូវបន្តខិតខំអភិវឌ្ឍសមត្ថភាពភាសាបរទេស និងការស្រាវជ្រាវរៀនសូត្រឱ្យបានទូលំទូលាយ ដោយបានរំលេចថា តម្លៃពិតប្រាកដនៃចំណេះដឹង គឺការដែលចេះប្រើប្រាស់ចំណេះដឹងនោះដើម្បីបង្កើតជាប្រយោជន៍ដល់សង្គមជាតិ។

សូមបញ្ជាក់ថា និស្សិតកម្ពុជាចំនួន ១៣នាក់ ទទួលបានអាហារូបករណ៍រដ្ឋាភិបាលបារាំង (Bourse France Excellence), សហភាពអឺរ៉ុប (EU-AFD) និងមូលនិធិ Pierre Fabre ដើម្បីទៅបន្តការសិក្សា នៅសាកលវិទ្យាល័យនៅប្រទេសបារាំង លើមុខជំនាញវិស្វកម្មអគ្គិសនី, វិស្វកម្មគីមីឧស្សាហកម្ម, វិស្វកម្មស៊ីវិល និងគ្រឿងផ្តុំ, វិស្វកម្មវិទ្យាសាស្ត្រកុំព្យូទ័រ, បច្ចេកវិទ្យាឱសថ និងសុខាភិបាល ដែលក្នុងនោះមាន ថ្នាក់បរិញ្ញាបត្រជាន់ខ្ពស់ចំនួន ៣នាក់ (នារី ២នាក់) និងថ្នាក់បណ្ឌិតចំនួន ១០នាក់ (នារី ២នាក់), គ្រោងនឹងចេញដំណើរទៅបន្តការសិក្សានៅខែវិច្ឆិកា ឆ្នាំ២០២៦ ខាងមុខនេះ៕

សូមចុចអាន៖ https://www.facebook.com/share/p/1F4GgrUCF6/