ឯកឧត្តមរដ្ឋមន្ត្រី ហួត ហាក់ អញ្ជើញប្រគល់កុំព្យូទ័រជំហានទី២ ជូនថ្នាក់ដឹកនាំ អង្គភាពចំណុះ និងមន្ទីរទេសចរណ៍រាជធានី-ខេត្ត ដើម្បីពង្រឹងប្រសិទ្ធភាពការងារ និងជំរុញបរិវត្តកម្មឌីជីថល

រាជធានីភ្នំពេញ៖ ក្រសួងទេសចរណ៍ បានរៀបចំកម្មវិធីប្រគល់-ទទួលកុំព្យូទ័រជំហានទី២ ជូនដល់ថ្នាក់ដឹកនាំ អង្គភាពចំណុះក្រសួងទេសចរណ៍ និងមន្ទីរទេសចរណ៍រាជធានី-ខេត្ត ក្រោមអធិបតីភាព ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ក្នុងគោលបំណងបង្កើនសមត្ថភាព និងប្រសិទ្ធភាពការងារ ព្រមទាំងជំរុញការប្រើប្រាស់បច្ចេកវិទ្យាឌីជីថលក្នុងការបំពេញភារកិច្ចឱ្យកាន់តែមានប្រសិទ្ធភាព។

កម្មវិធីនេះមានការអញ្ជើញចូលរួមពីថ្នាក់ដឹកនាំក្រសួង និងអង្គភាពចំណុះ មន្ទីរទេសចរណ៍រាជធានី ខេត្ត ព្រមទាំងមន្ត្រីនៃក្រសួងទេសចរណ៍។

រូបភាព 4 សន្លឹក

ក្នុងជំហានទី២នេះ ក្រសួងទេសចរណ៍ទទួលបានកុំព្យូទ័រចំនួន ១១០ គ្រឿង ពីក្រសួងប្រៃសណីយ៍ និងទូរគមនាគមន៍ ក្នុងនោះមានកុំព្យូទ័រលើតុ (Desktop) ចំនួន ៥០ គ្រឿង និងកុំព្យូទ័រយួរដៃ (Laptop) ចំនួន ៦០ គ្រឿង សម្រាប់ប្រគល់ជូនថ្នាក់ដឹកនាំ អង្គភាពចំណុះ និងមន្ទីរទេសចរណ៍រាជធានី-ខេត្ត។ គិតទាំងការប្រគល់លើកទី១ និងលើកទី២ ក្រសួងទេសចរណ៍ទទួលបានកុំព្យូទ័រសរុបចំនួន ៣៥០ គ្រឿង ដែលក្នុងនោះលើកទី១ មានចំនួន ២៤០ គ្រឿង និងលើកទី២ មានចំនួន ១១០ គ្រឿង។

ក្នុងឱកាសនោះ ឯកឧត្តមរដ្ឋមន្ត្រី បានថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ដែលបានផ្តល់កុំព្យូទ័រជូនក្រសួងទេសចរណ៍តាមការស្នើសុំ។

ឯកឧត្តមរដ្ឋមន្ត្រី ក៏បានណែនាំដល់ថ្នាក់ដឹកនាំ និងអង្គភាពដែលទទួលបានកុំព្យូទ័រ ត្រូវប្រើប្រាស់ឧបករណ៍ទាំងនេះឱ្យចំគោលដៅ ប្រកបដោយប្រសិទ្ធភាព និងយកចិត្តទុកដាក់ថែទាំជាប្រចាំ ដើម្បីធានាគុណភាព និងអាយុកាលប្រើប្រាស់បានយូរ។ ជាមួយគ្នានេះ ក្នុងករណីមានបញ្ហាបច្ចេកទេស អង្គភាពពាក់ព័ន្ធអាចទាក់ទងទៅផ្នែកការងារបរិវត្តកម្មឌីជីថលរបស់ក្រសួង ដើម្បីទទួលបានការគាំទ្រផ្នែកព័ត៌មានវិទ្យា។

ការផ្តល់សម្ភារបច្ចេកវិទ្យានេះ គឺជាការរួមចំណែកដ៏សំខាន់ក្នុងការពង្រឹងហេដ្ឋារចនាសម្ព័ន្ធឌីជីថល បង្កើនប្រសិទ្ធភាពនៃការបំពេញការងារ និងការផ្តល់សេវារដ្ឋបាល ព្រមទាំងគាំទ្រដល់ដំណើរការបរិវត្តកម្មឌីជីថលរបស់ក្រសួងទេសចរណ៍ឱ្យកាន់តែមានភាពទំនើប ឆាប់រហ័ស និងមានប្រសិទ្ធភាព ស្របតាមការវិវត្តនៃបច្ចេកវិទ្យាឌីជីថល។

ទីស្តីការក្រសួងទេសចរណ៍, ថ្ងៃទី២៤ ខែសីហា ឆ្នាំ២០២៦

សូមចុចអាន៖ https://www.facebook.com/share/p/1CAuWQXEQW/