ថ្ងៃទី១៤ កញ្ញា ២០២៦
ជំនួបសម្ដែងការគួរសម និងពិភាក្សាការងារជាមួយថ្នាក់ដឹកនាំវិទ្យាស្ថាន IT Academy STEP និង Sisters of Code ស្ដីពីការពង្រីកកិច្ចសហប្រតិបត្តិការលើគម្រោងអប់រំឌីជីថលនៅកម្ពុជា
រាជធានីភ្នំពេញ៖ នារសៀលថ្ងៃទី១៤ ខែកញ្ញា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានទទួលជួបសម្ដែងការគួរសម និងពិភាក្សាការងារជាមួយប្រតិភូវិទ្យាស្ថាន IT Academy STEP និង Sisters of Code ដឹកនាំដោយ លោកស្រី Rodionova Natalja នាយិកាប្រតិបត្តិ (Managing Partner) ដោយមានការអញ្ជើញចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា និងភាគីពាក់ព័ន្ធ។
ក្នុងឱកាសនេះ លោកស្រីនាយិកា បានកោតសរសើរ និងថ្លែងអំណរគុណដល់ក្រសួងអប់រំ យុវជន និងកីឡា ចំពោះការគាំទ្រ និងសម្របសម្រួលកម្មវិធីបណ្ដុះបណ្ដាលរបស់វិទ្យាស្ថាន ព្រមទាំងបានរាយការណ៍អំពីវឌ្ឍនភាពនៃកិច្ចសហប្រតិបត្តិការរវាងវិទ្យាស្ថាន IT Academy STEP និងក្រសួង តាមរយៈគម្រោង Sisters of Code ដែលបាននិងកំពុងអនុវត្តនៅតាមគ្រឹះស្ថានសិក្សាសាធារណៈ និងសាលារៀនជំនាន់ថ្មីក្នុងរាជធានីភ្នំពេញ និងបណ្ដាខេត្តចំនួន ១៩ ចាប់តាំងពីឆ្នាំ២០១៩ មក។ កិច្ចសហប្រតិបត្តិការនេះ សម្រេចបានសមិទ្ធផលសំខាន់ៗជាច្រើន ដូចជា៖
រូបភាព 7 សន្លឹក
១. ការផ្ដល់វគ្គបណ្ដុះបណ្ដាលសរសេរកូដឥតគិតថ្លៃ (Coding Clubs/Ambassadors Program) លើជំនាញ Visual Programming (Scratch), HTML/CSS, UX/UI Design និង Game Development ដល់សិស្សស្រីអាយុពី ១០ ដល់ ១៨ឆ្នាំ។
២. ការរៀបចំសិក្ខាសាលាបណ្ដុះបណ្ដាលគ្រូបង្រៀនមុខវិជ្ជាព័ត៌មានវិទ្យា អំពីវិធីសាស្ត្របង្រៀន STEM/Coding ការប្រើប្រាស់កម្មវិធី Scratch ដើម្បីដឹកនាំក្លឹបសិក្សា និងវគ្គបណ្ដុះបណ្ដាលពីការប្រើប្រាស់បញ្ញាសិប្បនិម្មិត (AI) ជាជំនួយដល់ការរៀននិងបង្រៀន។
៣. ការបញ្ជ្រាបមាតិកាសិក្សារបស់ Sisters of Code ទៅក្នុងបណ្ដាញ «សាលាឌីជីថល» (Digital School Platform) របស់ក្រសួង។
៤. ការកែសម្រួល និងពង្រីកកម្មវិធីសិក្សាកម្រិតបរិញ្ញាបត្ររង (Associate Degree) ព្រមទាំងដំណើរការដំឡើងកម្រិតស្ថាប័នដើម្បីផ្ដល់សញ្ញាបត្របរិញ្ញាបត្រវិទ្យាសាស្ត្រកុំព្យូទ័រ (Bachelor of Science in Computer Science)។
បន្ថែមលើនេះ លោកស្រីនាយិកា បានគូសបញ្ជាក់ពីចក្ខុវិស័យរបស់វិទ្យាស្ថាន IT Academy STEP ក្នុងការបណ្ដុះបណ្ដាលជំនាញបច្ចេកវិទ្យាព័ត៌មាន (IT Education) ជាមួយចំណាប់អារម្មណ៍បន្តពង្រឹង និងពង្រីកកិច្ចសហប្រតិបត្តិការជាមួយក្រសួងបន្ថែមទៀត លើវិស័យឧត្តមសិក្សា និងការអភិវឌ្ឍធនធានមនុស្សផ្នែកបច្ចេកវិទ្យាឌីជីថល ដើម្បីឆ្លើយតបទៅនឹងតម្រូវការសេដ្ឋកិច្ចឌីជីថលកម្ពុជា។
ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់វិទ្យាស្ថាន IT Academy STEP ដែលបានចូលរួមចំណែកយ៉ាងសកម្មក្នុងការលើកកម្ពស់ការអប់រំឌីជីថលនៅកម្ពុជា និងមានចំណាប់អារម្មណ៍ក្នុងការបន្តពង្រឹង ព្រមទាំងពង្រីកកិច្ចសហប្រតិបត្តិការ ដែលស៊ីចង្វាក់គ្នានឹងផែនការយុទ្ធសាស្ត្ររបស់ក្រសួង ក្នុងការជំរុញការអប់រំឌីជីថល ដើម្បីធានាបាននូវធនធានមនុស្សដែលមានជំនាញសតវត្សទី២១ ដោយផ្ដោតលើការពង្រឹងការអប់រំ STEM ការធ្វើបរិវត្តកម្មឌីជីថល (Digital Transformation) ក្នុងប្រព័ន្ធអប់រំ និងការបង្កើតកិច្ចសហប្រតិបត្តិការជិតស្និទ្ធរវាងគ្រឹះស្ថានសិក្សា និងវិស័យឧស្សាហកម្ម/ឯកជន។
ជាមួយគ្នានេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានរំលេចអំពីយុទ្ធសាស្ត្រ និងវឌ្ឍនភាពនៃការអប់រំឌីជីថលនៅតាមសាលារៀនសាធារណៈ និងសាលារៀនជំនាន់ថ្មី ដែលបច្ចុប្បន្នបានឈានចូលដល់ដំណាក់កាលផ្ដោតលើការអនុវត្តជាក់ស្ដែង ការបង្កើតថ្មី និងការគិតបែបស៊ីជម្រៅ (Critical Thinking & Innovation) តាមរយៈការបញ្ជ្រាបបច្ចេកវិទ្យាក្នុងកម្មវិធីសិក្សា ការបំពាក់ឧបករណ៍ និងការបង្កើនសមត្ថភាពគ្រូបង្រៀន។
សូមបញ្ជាក់ថា កិច្ចសហប្រតិបត្តិការរវាងវិទ្យាស្ថាន IT Academy STEP Cambodia និងក្រសួងអប់រំ យុវជន និងកីឡា ត្រូវបានអនុវត្តជាបន្តបន្ទាប់ ដោយផ្ដោតលើការអភិវឌ្ឍជំនាញបច្ចេកវិទ្យា និងការអប់រំ STEM/ICT នៅកម្ពុជា។ កិច្ចខិតខំប្រឹងប្រែងនេះ បានបង្កើតផលជះវិជ្ជមានជាច្រើន ក្នុងការជំរុញសិស្សស្រីឱ្យមានទំនុកចិត្តក្នុងការចាប់យកជំនាញបច្ចេកវិទ្យានៅកម្រិតឧត្តមសិក្សា ការពង្រឹងសមត្ថភាពគ្រូបង្រៀន និងការបង្កើតមជ្ឈមណ្ឌលធនធានមនុស្សឌីជីថល (Digital Talent Hub) ដែលស្របទៅនឹងយុទ្ធសាស្ត្របញ្ជ្រាបបច្ចេកវិទ្យា និងការអប់រំ STEM នៃក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា៕
សូមចុចអាន៖ https://www.facebook.com/share/p/1CW2TzpHsi/
