ក្រសួងមុខងារសាធារណៈ រៀបចំវគ្គបណ្តុះបណ្តាលអភិវឌ្ឍសមត្ថភាពឌីជីថល ដើម្បីពង្រឹងប្រសិទ្ធភាពការងាររដ្ឋបាល

ភ្នំពេញ៖ ដើម្បីឆ្លើយតបទៅនឹងការវិវត្តនៃបច្ចេកវិទ្យា និងពង្រឹងសមត្ថភាពមន្ត្រីរាជការ នាយកដ្ឋានធនធានមនុស្សនៃក្រសួងមុខងារសាធារណៈ កាលពីថ្ងៃទី១៩ ខែមិថុនា ឆ្នាំ២០២៦ បានរៀបចំវគ្គបណ្តុះបណ្តាលមួយក្រោមប្រធានបទ «ការអភិវឌ្ឍសមត្ថភាពឌីជីថល សម្រាប់កិច្ចការរដ្ឋបាល និងប្រព័ន្ធគ្រប់គ្រងទិន្នន័យ»។

វគ្គបណ្តុះបណ្តាលនេះ ធ្វើឡើងស្របតាមការចង្អុលបង្ហាញ និងចក្ខុវិស័យរបស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានបណ្តាញអគ្គលេខាធិការដ្ឋាន។

រូបភាព 5 សន្លឹក

ជាការកត់សម្គាល់ បណ្តាញអគ្គលេខាធិការដ្ឋាន ដើរតួនាទីជាស្នូលយ៉ាងសំខាន់បំផុត ក្នុងការតភ្ជាប់ និងសម្របសម្រួលកិច្ចការរដ្ឋបាលអន្តរក្រសួង-ស្ថាប័ន ឱ្យមានលំហូររលូន និងស៊ីចង្វាក់គ្នា។ បណ្តាញនេះ គឺជាយន្តការគន្លឹះក្នុងការលុបបំបាត់របៀបធ្វើការងារដាច់ដោយឡែកពីគ្នា និងជំរុញការធ្វើទំនើបកម្មរដ្ឋបាលសាធារណៈជារួម។ ក្នុងនាមជាសេនាធិការស្នូល និងជាប្រធានបណ្តាញនេះ ក្រសួងមុខងារសាធារណៈបាន និងកំពុងជំរុញយ៉ាងសកម្មឱ្យមានការអនុវត្តកិច្ចការងារស្តង់ដារ និងការប្រើប្រាស់ប្រព័ន្ធចរន្តឯកសាររួមគ្នាតែមួយ ដើម្បីធានាបាននូវការផ្តល់សេវា និងរដ្ឋបាលកិច្ចប្រកបដោយប្រសិទ្ធភាព តម្លាភាព និងភាពឆ្លើយតបខ្ពស់។

កម្មវិធីបណ្តុះបណ្តាលដែលប្រព្រឹត្តទៅនៅទីស្តីការក្រសួងមុខងារសាធារណៈនេះ ត្រូវបានដឹកនាំដោយ លោក ឡេង សុភក្ត្រ ប្រធាននាយកដ្ឋានធនធានមនុស្ស ដោយមានការអញ្ជើញចូលរួមពីសំណាក់លោក លោកស្រី ដែលជាមន្ត្រីជំនាញនៃនាយកដ្ឋានរដ្ឋបាល និងនាយកដ្ឋានហិរញ្ញវត្ថុជាច្រើនរូប៕

សូមចុចអាន៖ https://www.facebook.com/share/p/197KhWh4Zr/