ក្រសួងកិច្ចការនារី សហការជាមួយក្រសួងមហាផ្ទៃ និងមានការគាំទ្រពីធនាគារអភិវឌ្ឍន៍អាស៊ី (ADB) ជាដៃគូយុទ្ធសាស្ត្រ បានរៀបចំសិក្ខាសាលា​ប្រកាសដាក់ឱ្យអនុវត្តជាផ្លូវការគម្រោង «ការពង្រឹងប្រព័ន្ធថ្នាក់ជាតិដើម្បីដោះស្រាយ និងទប់ស្កាត់អំពើហិង្សាទាក់ទងនឹងយេនឌ័រនៅព្រះរាជាណាចក្រកម្ពុជា»

ក្រសួងកិច្ចការនារី សហការជាមួយក្រសួងមហាផ្ទៃ និងមានការគាំទ្រពីធនាគារអភិវឌ្ឍន៍អាស៊ី (ADB) ជាដៃគូយុទ្ធសាស្ត្រ បានរៀបចំសិក្ខាសាលា​ប្រកាសដាក់ឱ្យអនុវត្តជាផ្លូវការគម្រោង «ការពង្រឹងប្រព័ន្ធថ្នាក់ជាតិដើម្បីដោះស្រាយ និងទប់ស្កាត់អំពើហិង្សាទាក់ទងនឹងយេនឌ័រនៅព្រះរាជាណាចក្រកម្ពុជា» ក្រោមអធិបតីភាពដ៏ខ្ពង់ខ្ពស់ លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី នារសៀលថ្ងៃទី២១ ខែឧសភា ឆ្នាំ២០២៦ នៅសណ្ឋាគារកាំបូឌីយ៉ាណា រាជធានីភ្នំពេញ។

សិក្ខាសាលាប្រកាសដាក់ឱ្យអនុវត្តគម្រោងនេះ មានគោលបំណងណែនាំជាផ្លូវការអំពីគម្រោង ចែករំលែកគោលបំណង និងយុទ្ធសាស្ត្រអនុវត្តសំខាន់ៗ ពង្រឹងការសម្របសម្រួល និងកិច្ចសហការរវាងភាគីពាក់ព័ន្ធសំខាន់ៗ ព្រមទាំងបង្កើនការយល់ដឹងរួម ដើម្បីគាំទ្រការអនុវត្តគម្រោងឱ្យមានប្រសិទ្ធភាព និងប្រកបដោយចីរភាព ទាំងនៅថ្នាក់ជាតិ និងថ្នាក់ក្រោមជាតិ។

+10

រូបភាព 15 សន្លឹក

គម្រោង «ការពង្រឹងប្រព័ន្ធថ្នាក់ជាតិដើម្បីដោះស្រាយ និងទប់ស្កាត់អំពើហិង្សាទាក់ទងនឹងយេនឌ័រនៅព្រះរាជាណាចក្រកម្ពុជា» មានរយៈពេល ៥ ឆ្នាំ (២០២៥–២០២៩) គឺជាសកម្មភាពដ៏សំខាន់មួយក្នុងការពង្រឹងប្រព័ន្ធថ្នាក់ជាតិ និងថ្នាក់ក្រោមជាតិ សម្រាប់ការបង្ការ ទប់ស្កាត់ និងឆ្លើយតបចំពោះអំពើហិង្សាទាក់ទងនឹងយេនឌ័រ តាមរយៈការពង្រឹងប្រព័ន្ធអភិបាលកិច្ច ការផ្តល់សេវាផ្តោតលើជនរងគ្រោះ ការប្រើប្រាស់បច្ចេកវិទ្យាឌីជីថល និងនវានុវត្តន៍ ការប្រើប្រាស់ទិន្នន័យ និងភស្តុតាង ព្រមទាំងការពង្រឹងការសម្របសម្រួលពហុវិស័យ។

គម្រោងនេះក៏ឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការលើកកម្ពស់សមភាពយេនឌ័រ ពង្រឹងប្រព័ន្ធការពារ និងការគាំទ្រសម្រាប់ស្ត្រី និងក្មេងស្រី ព្រមទាំងធានាថាគ្មាននរណាម្នាក់ត្រូវបានទុកចោលឡើយ។

លោកជំទាវកិត្តិបណ្ឌិតរដ្ឋមន្ត្រី បានគូសបញ្ជាក់ថា ការបង្ការ និងដោះស្រាយអំពើហិង្សាទាក់ទងនឹងយេនឌ័រ មិនអាចអនុវត្តដោយស្ថាប័ន ឬគម្រោងណាមួយតែមួយបានទេ ប៉ុន្តែទាមទារឱ្យមានការចូលរួម កិច្ចសហការ និងការប្តេជ្ញាចិត្តរួមពីគ្រប់ភាគីពាក់ព័ន្ធ ដែលតាមរយៈគម្រោងនេះ ជាការបញ្ជាក់ជាថ្មីអំពីការប្តេជ្ញាចិត្តរួមក្នុងការកសាងសង្គមមួយ ដែលស្ត្រី និងក្មេងស្រីអាចរស់នៅដោយសុវត្ថិភាព សេចក្តីថ្លៃថ្នូរ និងមានឱកាសស្មើភាពគ្នា។

សូមចុចអាន៖ https://www.facebook.com/share/p/1AUe9TFMv7/