ថ្ងៃទី២៩ ឧសភា ២០២៦
ឯកឧត្តមបណ្ឌិត គឹម សន្តិភាព រដ្ឋលេខាធិការក្រសួងយុត្តិធម៌ បានអញ្ជើញដឹកនាំកិច្ចប្រជុំពិនិត្យលើវឌ្ឍនភាពនៃការរៀបចំប្រព័ន្ធអនុគ្រោះទោសឌីជីថលនៃអគ្គនាយកដ្ឋានកិច្ចការទោសព្រហ្មទណ្ឌក្រសួងយុត្តិធម៌
រាជធានីភ្នំពេញ៖ នៅព្រឹកថ្ងៃសុក្រ ទី២៩ ខែឧសភា ឆ្នាំ២០២៦ នាទីស្តីការក្រសួងយុត្តិធម៌ ឯកឧត្តមបណ្ឌិត គឹម សន្តិភាព រដ្ឋលេខាធិការក្រសួងយុត្តិធម៌ បានអញ្ជើញដឹកនាំកិច្ចប្រជុំពិនិត្យលើវឌ្ឍនភាពនៃការរៀបចំប្រព័ន្ធអនុគ្រោះទោសឌីជីថលនៃអគ្គនាយកដ្ឋានកិច្ចការទោសព្រហ្មទណ្ឌក្រសួងយុត្តិធម៌ ដែលបានរៀបចំអភិវឌ្ឍន៍ដោយក្រុមការងារបច្ចេកទេសដើម្បីអនុវត្តការងារជម្រុញឌីជីថលូបនីយកម្មក្រសួងយុត្តិធម៌ ។
ប្រព័ន្ធអនុគ្រោះទោសឌីជីថល ត្រូវបានអភិវឌ្ឍន៍ឡើងក្រោមការដឹកនាំ និងចង្អុលបង្ហាញដ៏ខ្ពង់ខ្ពស់របស់ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានគណៈកម្មការថ្នាក់ជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស ក្នុងគោលបំណងដើម្បីគ្រប់គ្រងការអនុគ្រោះទោសឱ្យបាន់តែធានាបាននូវប្រសិទ្ធិភាព តម្លាភាព និងភាពងាយស្រួល សម្រាប់ការងារអនុគ្រោះទោសនៅគ្រប់ដំណាក់កាលនៃនីតិវិធីរបស់គណៈកម្មការពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោសគ្រប់ថ្នាក់ ។ ជារួមប្រព័ន្ធអនុគ្រោះទោសឌីជីថលនេះ បានអភិវឌ្ឍន៍រួចរាល់ប្រមាណជាង៩៥%ហើយ ដែលនឹងឈានទៅបញ្ចប់នាពេលឆាប់ៗខាងមុខ ដើម្បីប្រកាសដាក់ឱ្យដំណើរការជាផ្លូវការ ។
រូបភាព 9 សន្លឹក
កិច្ចប្រជុំនេះ មានការអញ្ជើញចូលរួមពី ឯកឧត្តម ផេង សុខលាភ អនុរដ្ឋលេខាធិការ និងជាប្រធានក្រុមការងារបច្ចេកទេសដើម្បីអនុវត្តការងារជម្រុញឌីជីថលូបនីយកម្ម ឯកឧត្តម ជាម សត្យា ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានកិច្ចការទោសព្រហ្មទណ្ឌ និងមន្រ្តីជំនាញកិច្ចការឌីជីថលក្រសួងយុត្តិធម៌ចូលរួមផងដែរ។
សូមចុចអាន៖ https://www.moj.gov.kh/kh/news-event/3808
