ក្រសួងមុខងារសាធារណៈ ពង្រឹងសមត្ថភាពឌីជីថល សម្រាប់កិច្ចការរដ្ឋបាល និងប្រព័ន្ធគ្រប់គ្រងទិន្នន័យមន្ត្រីជូនមន្ត្រីមន្ទីមុខងារសាធារណៈរាជធានី-ខេត្ត

កាលពីរសៀលថ្ងៃទី២៥ ខែមិថុនា ឆ្នាំ២០២៦ ឯកឧត្តម សៀត វិចិត្រ អគ្គលេខាធិការ នៃអគ្គលេខាធិការដ្ឋានក្រសួងមុខងារសាធារណៈ តំណាងដ៏ខ្ពង់ខ្ពស់ ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានអញ្ជើញជាអធិបតីក្នុងបិទវគ្គបណ្តុះបណ្តាលស្តីពី «ការអភិវឌ្ឍសមត្ថភាពឌីជីថល សម្រាប់កិច្ចការរដ្ឋបាល និងប្រព័ន្ធគ្រប់គ្រងទិន្នន័យមន្ត្រី» ជូនដល់អនុប្រធានមន្ទីរ និងប្រធានការិយាល័យនៃមន្ទីរមុខងារសាធារណៈទាំង២៥ រាជធានី-ខេត្ត នៅទីស្តីការក្រសួង។

ក្នុងកម្មវិធីបិទវគ្គបណ្តុះបណ្តាលនេះ ឯកឧត្តមអគ្គលេខាធិការ បានលើកឡើងថា វគ្គបណ្តុះបណ្តាលនេះ ស្តែងឱ្យឃើញពីការយកចិត្តទុកដាក់ក្នុងការអនុវត្តគោលនយោបាយរបស់រាជរដ្ឋាភិបាលកាន់តែខ្លាំងឡើងៗ ជាពិសេសការកសាង និងអភិវឌ្ឍវិស័យមុខងារសាធារណៈ នៃព្រះរាជាណាចក្រកម្ពុជា ដើម្បីឱ្យឆ្លើយតបទៅនឹងតម្រូវការអភិវឌ្ឍជាតិ ក៏ដូចជាស្របតាមអាទិភាពគន្លឹះទី១ នៃយុទ្ធសាស្រ្តបញ្ចកោណដំណាក់កាលទី១ គឺ "មនុស្ស"។

រូបភាព 5 សន្លឹក

ឯកឧត្តមអគ្គលេខាធិការ សង្ឃឹមជឿជាក់ថា តាមរយៈការធ្វើបទបង្ហាញ និងការអនុវត្ត លោក លោកស្រីជាសិក្ខាកាមទាំងអស់ ដែលបានឆ្លងកាត់វគ្គបណ្តុះបណ្តាលនេះ ពិតជាទទួលបាននូវចំណេះដឹង និងបទពិសោធល្អៗ ដែលទទួលបានពីវគ្គនេះ យកទៅចែករំលែក និងពង្រីកការប្រើប្រាស់ឱ្យបានចំគោលដៅ ព្រមទាំងបន្តខិតខំអភិវឌ្ឍសមត្ថភាពនៅតាមមន្ទីររបស់ខ្លួនបន្ថែមទៀតតាមដែលអាចធ្វើទៅបាន សំដៅពង្រឹង និងពង្រីកការយល់ដឹងបន្ថែម ដើម្បីក្លាយខ្លួនទៅជាមូលធនមនុស្សដ៏មានសារៈសំខាន់ សម្រាប់បម្រើឱ្យការអនុវត្តគោលនយោបាយរបស់រាជរដ្ឋាភិបាល ក្នុងការអភិវឌ្ឍន៍របស់ប្រទេស និងដើម្បីបម្រើសេវាសាធារណៈជូនដល់ប្រជាពលរដ្ឋ ប្រកបដោយគុណភាព ប្រសិទ្ធភាព និងការជឿទុកចិត្ត៕

សូមចុចអាន៖ https://www.facebook.com/share/p/1HqZTEuB2A/