ថ្ងៃទី១ មេសា ២០២៦
ពិធីចុះកិច្ចព្រមព្រៀងចងសម្ព័ន្ធមេត្រីភាពរវាងនាយកដ្ឋានបរិវត្តកម្មឌីជីថល នាយកដ្ឋានរដ្ឋបាល ជាមួយសាលាបឋមសិក្សាគោកប្រាសាទ ខេត្តឧត្តរមានជ័យ
ខេត្តឧត្តរមានជ័យ៖ នាព្រឹកថ្ងៃទី១ ខែមេសា ឆ្នាំ២០២៦ នាយកដ្ឋានបរិវត្តកម្មឌីជីថល និងនាយកដ្ឋានរដ្ឋបាល នៃក្រសួងអប់រំ យុវជន និងកីឡា បានរៀបចំពិធីចុះកិច្ចព្រមព្រៀងចងសម្ព័ន្ធមេត្រីភាព ជាមួយសាលាបឋមសិក្សាគោកប្រាសាទ ខេត្តឧត្តរមានជ័យ ក្រោមអធិបតីភាព ឯកឧត្តម ទេព ភិយ្យោរិទ្ធ អគ្គលេខាធិការ នៃអគ្គលេខាធិការដ្ឋាន នៃក្រសួងអប់រំ យុវជន និងកីឡា។ ការចុះហត្ថលេខាចងសម្ព័ន្ធត្រីភាគី ត្រូវបានធ្វើឡើងដោយ លោក សុក ថា ប្រធាននាយកដ្ឋានបរិវត្តកម្មឌីជីថល លោកស្រី ជាតិ រតនៈវតី ប្រធាននាយកដ្ឋានរដ្ឋបាល និងលោក ជឿន ស្នា នាយកសាលាបឋមសិក្សាគោកប្រាសាទ ខេត្តឧត្តរមានជ័យ ព្រមទាំងមានការចូលរួមពីសំណាក់ លោកគ្រូ អ្នកគ្រូ អាណាព្យាបាលសិស្សានុសិស្ស។
ក្នុងឱកាសនេះ នាយកដ្ឋានបរិវត្តកម្មឌីជីថល និងនាយកដ្ឋានរដ្ឋបាល បាននាំយកនូវសម្ភារៈសិក្សា និងសម្ភារៈប្រើប្រាសប្រគល់ជូនសាលា តបតាមសំណើរបស់នាយកសាលា និងគ្រូបង្រៀន រួមមាន កុំព្យូទ័រយួរដៃ ម៉ាស៊ីនព្រីន ថវិកាឧបត្ថម្ភ។ ព្រមជាមួយគ្នានេះ គណៈប្រតិភូក៏បានចុះសួរសុខទុក្ខ សិស្សានុសិស្សដែលកំពុងខិតខំប្រឹងប្រែងសិក្សាក្នុងរោងតង់សិក្សាបណ្តោះអាសន្ន ដោយសារអគារសិក្សា ខូចខាតបែកបាក់ធ្លុះធ្លាយដោយសារគ្រាប់ផ្លោង ផងដែរ។
រូបភាព 11 សន្លឹក
សកម្មភាពនេះ បង្ហាញពីការយកចិត្តទុកដាក់ និងការគាំទ្រយ៉ាងជាប់លាប់របស់ក្រសួងអប់រំ យុវជន និងកីឡាក្នុងការលើកទឹកចិត្តដល់លោកគ្រូ អ្នកគ្រូ និងរួមចំណែកលើកកម្ពស់គុណភាពអប់រំនៅកម្ពុជា ទោះក្នុងកាលៈទេសៈណាក៏ដោយ៕
សូមចុចអាន៖ https://www.facebook.com/share/p/1CudnrK47Z/
