ថ្ងៃទី១៣ មិថុនា ២០២៦
ពិធីសំណេះសំណាលជាមួយបុគ្គលិកអប់រំ គរុនិស្សិត និងបាឋកថាគន្លឹះស្ដីពី «កំណែទម្រង់គ្រូបង្រៀនក្នុងបរិវត្តកម្មឌីជីថលឆ្ពោះទៅកម្ពុជាឆ្នាំ២០៥០»
បាត់ដំបង៖ នាព្រឹកថ្ងៃទី១៣ ខែមិថុនា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានក្រុមប្រឹក្សាបច្ចេកទេសនៃវិទ្យាស្ថានគរុកោសល្យបាត់ដំបង បានអញ្ជើញជាអធិបតីក្នុងពិធីសំណេះសំណាលជាមួយបុគ្គលិកអប់រំ គរុនិស្សិត និងបាឋកថាគន្លឹះស្ដីពី «កំណែទម្រង់គ្រូបង្រៀនក្នុងបរិវត្តកម្មឌីជីថលឆ្ពោះទៅកម្ពុជាឆ្នាំ២០៥០» នៅសាលមហោស្រពស្ទឹងសង្កែ ខេត្តបាត់ដំបង។
ពិធីនេះមានការអញ្ជើញចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា តំណាងក្រុមប្រឹក្សាខេត្ត អភិបាលរងនៃគណៈអភិបាលខេត្តបាត់ដំបង ឯកឧត្តមបណ្ឌិត នាយកវិទ្យាស្ថានគរុកោសល្យបាត់ដំបង ឯកឧត្តមសាកលវិទ្យាធិការសាកលវិទ្យាល័យជាតិបាត់ដំបង គណៈគ្រប់គ្រង និងបុគ្គលិកអប់រំនៃវិទ្យាស្ថានគរុកោសល្យបាត់ដំបង (វ.គ.ប) ប្រធានមន្ទីរមុខងារសាធារណៈ ប្រធានមន្ទីរអប់រំ យុវជន និងកីឡា ប្រធានការិយាល័យអប់រំក្រុង ស្រុកទាំង១៤ បុគ្គលិកអប់រំគ្រប់លំដាប់ថ្នាក់នៃអនុវិទ្យាល័យអនុវត្តន៍ និងបឋមសិក្សាអនុវត្តន៍ គ្រូបង្រៀនគ្រប់កម្រិត គរុនិស្សិត និងសិក្ខាកាមវគ្គបណ្ដុះបណ្ដាលវិជ្ជាជីវៈជាប្រចាំ សរុបចំនួនប្រមាណ ១ ៥៦៥នាក់។
រូបភាព 8 សន្លឹក
បន្ទាប់ពីស្ដាប់របាយការណ៍ស្ដីពី ការបណ្ដុះបណ្ដាលគ្រូបង្រៀនតាមប្រព័ន្ធ ១២+៤ និងបរិញ្ញាបត្រ+១ របស់ឯកឧត្តមបណ្ឌិត នាយកវិទ្យាស្ថានគរុកោសល្យបាត់ដំបងរួចមក ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានវាយតម្លៃខ្ពស់ចំពោះគណៈគ្រប់គ្រង គ្រូឧទ្ទេស និងបុគ្គលិកអប់រំគ្រប់លំដាប់ថ្នាក់នៃ វ.គ.ប ដែលបានខិតខំប្រឹងប្រែងបំពេញការងារប្រកបដោយស្មារតីទទួលខុសត្រូវខ្ពស់ មានភាពបត់បែន និងភាពធន់ ដើម្បីឆ្លើយតបទៅនឹងចក្ខុវិស័យ ផែនការយុទ្ធសាស្ត្ររបស់ក្រសួងអប់រំ ក្នុងកំណែទម្រង់ការអប់រំចាប់ពីដំណាក់កាលទី១ និងដំណាក់កាលទី២ ដែលបាននិងកំពុងអនុវត្តយ៉ាងសកម្មនាពេលនេះ។ តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងទទួលស្គាល់នូវលទ្ធផលជោគជ័យជាទីមោទនៈនៃការបណ្ដុះបណ្ដាលគ្រូបង្រៀនបឋមសិក្សា និងអនុវិទ្យាល័យទាំងតាមប្រព័ន្ធ ១២+៤ និងបរិញ្ញាបត្រ+១ របស់វិទ្យាស្ថានគរុកោសល្យបាត់ដំបងនាពេលកន្លងមក និងកិច្ចខិតខំប្រឹងប្រែងអភិវឌ្ឍសមត្ថភាពរបស់គរុនិស្សិតទាំងអស់ ដែលជាកម្លាំងចលករដ៏សំខាន់ក្នុងកំណែទម្រង់គុណភាពអប់រំនៅកម្ពុជា។
បន្ថែមពីនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានសំណេះសំណាលសាកសួរសុខទុក្ខស្ថានភាពការងារ ជីវភាពរស់នៅ និងបញ្ហាប្រឈមនានារបស់បុគ្គលិកអប់រំ ក៏ដូចជាការរៀននិងបង្រៀនរបស់គរុនិស្សិតទាំងអស់ ដោយបានលើកទឹកចិត្តដល់បុគ្គលិកអប់រំគ្រប់កម្រិត ជាពិសេសគរុនិស្សិត គ្រូបង្រៀនកិច្ចសន្យា និងគ្រូបឋមសិក្សាផ្អែកលើកិច្ចព្រមព្រៀងការងារដែលកំពុងបង្រៀននិងទទួលការបណ្ដុះបណ្ដាលនៅវិទ្យាស្ថានគរុកោសល្យបាត់ដំបង ឱ្យបន្តខិតខំរៀនសូត្រអភិវឌ្ឍសមត្ថភាព ចែករំលែកចំណេះដឹង ជំនាញ និងបទពិសោធន៍ដល់សិស្សគ្រប់រូប ដើម្បីធានាបាននូវការអប់រំប្រកបដោយបរិយាបន្ន និងសមធម៌ ដោយគូសបញ្ជាក់ថា ពេលយើងរួមគ្នាបង្កើតបាននូវសមិទ្ធផល និងវឌ្ឍនភាពលើវិស័យអប់រំ យើងនឹងទទួលបាននូវទំនុកចិត្ត និងការគាំទ្របន្ថែមទៀតពីគ្រប់មជ្ឈដ្ឋាន ដែលនេះជាកម្លាំងជំរុញដ៏សំខាន់ឆ្ពោះទៅសម្រេចឧត្តមភាពការអប់រំ។
តាមរយៈសុន្ទរកថា និងបាឋកថាគន្លឹះស្ដីពី «កំណែទម្រង់គ្រូបង្រៀនក្នុងបរិវត្តកម្មឌីជីថលឆ្ពោះទៅកម្ពុជាឆ្នាំ២០៥០» ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានគូសរំលេចចំណុចសំខាន់ៗមួយចំនួនដូចជា៖
•ចក្ខុវិស័យកម្ពុជាឆ្នាំ២០៥០៖ អភិវឌ្ឍធនធានមនុស្ស និងជំនាញពេញមួយជីវិត ក្នុងគោលដៅបំពាក់នូវចំណេះដឹង អំណត់ធ្មត់ និងសីលធម៌ ដើម្បីបង្កើនមូលធនមនុស្សប្រកបដោយគុណភាព បច្ចេកវិទ្យា និងនវានុវត្តន៍
•ការកសាងមូលធនមនុស្ស៖ ត្រូវឈរលើការបណ្ដុះចំណេះដឹងវិទ្យាសាស្ត្រ ភាពស៊ូទ្រាំ និងសីលធម៌ ដែលជាទស្សនវិជ្ជាថ្មីនៃភាពរីកចម្រើនបន្ថែមលើសារៈសំខាន់នៃចំណេះដឹង និងការវិនិយោគលើការអប់រំ
•យុទ្ធសាស្ត្របញ្ចកោណដំណាក់កាលទី១ (ផ្ដោតលើការអភិវឌ្ឍមូលធនមនុស្ស)៖ ក្រសួងបាននិងកំពុងបន្តកែទម្រង់អភិបាលកិច្ចសាលារៀន ជំរុញការអនុវត្តស្តង់ដារសាលារៀនគំរូ សាលារៀនជំនាន់ថ្មី និងគុណភាពនៃការបណ្ដុះបណ្ដាលគ្រូបង្រៀន តាមរយៈការកែលម្អវិធីសាស្ត្របង្រៀន និងបន្តលើកកម្ពស់ជីវភាព ព្រមទាំងគុណតម្លៃបុគ្គលិកអប់រំគ្រប់កម្រិត
•ការអប់រំឌីជីថល ហេដ្ឋារចនាសម្ព័ន្ធឌីជីថល វិទ្យាសាស្ត្រ និងបច្ចេកវិទ្យា៖ ការពង្រឹងអភិបាលកិច្ចគ្រឹះស្ថានឧត្តមសិក្សា ការស្រាវជ្រាវ ការអភិវឌ្ឍ និងនវានុវត្តន៍។ ចំណែកការអភិវឌ្ឍសេដ្ឋកិច្ច និងសង្គមឌីជីថលគឺត្រូវផ្ដោតលើធនធានមនុស្ស និងអ្នកមានទេពកោសល្យក្នុងជំនាញវិទ្យាសាស្ត្រ បច្ចេកវិទ្យា នវានុវត្តន៍ និងសមត្ថភាពនៃការស្រាវជ្រាវនៅតាមគ្រឹះស្ថានសិក្សា និងគ្រឹះស្ថានបណ្ដុះបណ្ដាលគ្រូ
• ក្នុងយុគសម័យបច្ចេកវិទ្យាឌីជីថល ឬបរិវត្តកម្មឌីជីថល៖ គុណភាពគ្រូបង្រៀនមិនមែនវាស់វែងតែលើសញ្ញាបត្រនោះទេ គឺត្រូវផ្អែកលើសមត្ថភាពនៃការអភិវឌ្ឍវិជ្ជាជីវៈជាប្រចាំ (CPD) និងការរៀនសូត្រពេញមួយជីវិត ដើម្បីឱ្យគ្រូបង្រៀនមានសមត្ថភាពគ្រប់គ្រាន់ ដើរឱ្យទាន់ការប្រែប្រួលសកលលោក។ ដូច្នេះ ការធ្វើកំណែទម្រង់ការអប់រំគ្រូបង្រៀន គឺជាកិច្ចការដែលត្រូវធ្វើជាប្រចាំ និងឥតឈប់ឈរ
•សូមលោកគ្រូ អ្នកគ្រូ បុគ្គលិកអប់រំទាំងអស់ បន្តអភិវឌ្ឍវិជ្ជាជីវៈជាប្រចាំ៖ ធ្វើការស្រាវជ្រាវ អភិវឌ្ឍសមត្ថភាពភាសាបរទេស និងសមត្ថភាពបច្ចេកវិទ្យាឌីជីថល ដើម្បីឆ្លើយតបទៅនឹងស្តង់ដារវិជ្ជាជីវៈគ្រូបង្រៀន និងសូមចងចាំថា គ្រូបង្រៀនគឺជាសរសៃឈាម និងជាកម្លាំងចលករជួរមុខនៃដំណើរការកំណែទម្រង់ការអប់រំ
•ការចូលរួមយ៉ាងសកម្ម៖ ក្រសួងត្រូវការចាំបាច់ណាស់នូវការចូលរួមយ៉ាងសកម្មរបស់លោកគ្រូ អ្នកគ្រូ ប្អូនៗគរុនិស្សិត សិស្សានុសិស្ស គ្រឹះស្ថានសិក្សា ការគាំទ្រពីសហគមន៍ និងដៃគូអភិវឌ្ឍន៍ទាំងអស់ ដើម្បីឱ្យដំណើរការអប់រំនៅកម្ពុជាសម្រេចបានជាផ្លែផ្កាពិតប្រាកដ និងបណ្ដុះបាននូវធនធានមនុស្សប្រកបដោយសក្ដានុពលសម្រាប់ចូលរួមអភិវឌ្ឍប្រទេសជាតិ ដែលនេះជាមោទនភាពដ៏ធំបំផុតក្នុងអាជីពជាគ្រូបង្រៀន៕
