ថ្ងៃទី៧ ឧសភា ២០២៦
គ្រូបង្រៀនតាមបន្ទាត់ព្រំដែនទទួលការបណ្តុះបណ្តាលតាមអនឡាញស្ដីពី «ការប្រើប្រាស់ប្រព័ន្ធផ្សព្វផ្សាយ និងបញ្ញាសិប្បនិម្មិត»
នាថ្ងៃទី៧ ខែមេសា ឆ្នាំ២០២៦ នាយកដ្ឋានបរិវត្តកម្មឌីជីថលក្រសួងអប់រំ យុវជន និងកីឡា បានរៀបចំវគ្គបណ្ដុះបណ្ដាលតាមអនឡាញស្ដីពី «ការប្រើប្រាស់ប្រព័ន្ធផ្សព្វផ្សាយ និងបញ្ញាសិប្បនិម្មិត» ក្នុងគោលបំណងលើកកម្ពស់ការប្រើប្រាស់បញ្ញាសិប្បនិម្មិត (AI) បច្ចេកវិទ្យាឌីជីថល ជំនួយដល់ការបង្រៀន និងរៀន ព្រមទាំងពង្រឹងសមត្ថភាពក្នុងការគ្រប់គ្រងទំព័រហ្វេសប៊ុក ការប្រើប្រាស់បណ្តាញសង្គមប្រកបដោយប្រសិទ្ធភាព សុវត្ថិភាព និងការទទួលខុសត្រូវ។
វគ្គបណ្ដុះបណ្ដាលនេះ មានការចូលរួមពីលោកគ្រូ អ្នកគ្រូមកពីតំបន់ដាច់ស្រយាល និងខេត្តជាប់ព្រំដែន រួមមានខេត្តព្រះវិហារ សៀមរាប ឧត្ដរមានជ័យ បន្ទាយមានជ័យ និងពោធិ៍សាត់។ សិក្ខាកាមយល់ឃើញថាវគ្គបណ្តុះបណ្តាលនេះមានសារសំខាន់ជាខ្លាំង សម្រាប់ការងារបង្រៀន និងការរស់នៅប្រចាំថ្ងៃ។
រូបភាព 6 សន្លឹក
សូមជម្រាបជូនថា ក្រៅពីការរៀបចំវគ្គបណ្តុះបណ្តាលអនឡាញ នាយកដ្ឋានបរិវត្តកម្មឌីជីថល នឹងចុះបណ្តុះបណ្តាលផ្ទាល់ ព្រមទាំងបានចុះជួយគាំទ្របំពាក់បរិក្ខាបច្ចេកវិទ្យា ដើម្បីលើកកម្ពស់ហេដ្ឋារចនាសម្ព័ន្ធឌីជីថលនៅតាមសាលារៀនដែលរងផលប៉ះពាល់ដោយសារសង្គ្រាមព្រំដែន។ សកម្មភាពនេះ បង្ហាញពីការយកចិត្តទុកដាក់ និងការគាំទ្រយ៉ាងជាប់លាប់របស់ក្រសួងអប់រំ យុវជន និងកីឡា ក្នុងការគាំទ្រដល់លោកគ្រូ អ្នកគ្រូ និងរួមចំណែកលើកកម្ពស់គុណភាពអប់រំនៅកម្ពុជា នៅគ្រប់កាលៈទេសៈ៕
សូមចុចអាន៖ https://www.facebook.com/share/p/191xb74mD1/
