សិក្ខាសាលាស្ដីពី «ការអភិវឌ្ឍសមត្ថភាពគ្រូជំនួយលើជំនាញបច្ចេកវិទ្យាកុំព្យូទ័រ សម្រាប់អនុវត្តកម្មវិធីគន្លងវិជ្ជាជីវៈ ក្នុងឆ្នាំសិក្សា២០២៥-២០២៦»

ខេត្តកំពត៖ ចាប់ពីថ្ងៃទី១៩ ដល់ថ្ងៃទី២១ ខែមិថុនា ឆ្នាំ២០២៦ ក្នុងក្របខណ្ឌការងារអនុវត្តគន្លងអប់រំថ្មីនៅកម្ពុជា នាយកដ្ឋានតម្រង់ទិសវិជ្ជាជីវៈ បានរៀបចំសិក្ខាសាលាស្ដីពី «ការអភិវឌ្ឍសមត្ថភាពគ្រូជំនួយលើជំនាញបច្ចេកវិទ្យាកុំព្យូទ័រ សម្រាប់អនុវត្តកម្មវិធីគន្លងវិជ្ជាជីវៈ ក្នុងឆ្នាំសិក្សា២០២៥-២០២៦» នៅសាលាគរុកោសល្យ និងវិក្រឹតការខេត្តកំពត។ សិក្ខាសាលានេះ ត្រូវបានប្រារព្ធកម្មវិធីបើកក្រោមអធិបតីភាពរបស់ ឯកឧត្តម ជា ជាតិ អនុរដ្ឋលេខាធិការនៃក្រសួងអប់រំ យុវជន និងកីឡា ដោយមានការចូលរួមពី ថ្នាក់ដឹកនាំ និងបុគ្គលិកអប់រំនាយកដ្ឋានជំនាញ តំណាងមន្ទីរអប់រំ យុវជន និងកីឡាខេត្តតាកែវ លោកគ្រូ អ្នកគ្រូ ជាគ្រូឧទ្ទេសនៃសាលារៀនជំនាន់ថ្មី លោកគ្រូឧទ្ទេសនៃវិទ្យាស្ថានបច្ចេកវិទ្យាកំពង់ស្ពឺ លោកគ្រូ អ្នកគ្រូ ជាគ្រូជំនួយថ្នាក់រៀននៃវិទ្យាល័យគោលដៅទាំង២៨ សរុបចំនួន ៨០នាក់ (ស្រី ១៤នាក់)។

សិក្ខាសាលានេះ ត្រូវបានរៀបចំឡើងក្នុងគោលបំណងអភិវឌ្ឍសមត្ថភាពលោកគ្រូ អ្នកគ្រូ ជាគ្រូជំនួយនៅតាមវិទ្យាល័យគោលដៅ ដែលនឹងត្រូវសម្របសម្រួលយន្តការថ្នាក់រៀនលើការបង្រៀន និងរៀនតាមប្រព័ន្ធអនឡាញ ក្នុងគន្លងវិជ្ជាជីវៈលើមុខជំនាញបច្ចេកវិទ្យាកុំព្យូទ័រឱ្យមានប្រសិទ្ធភាព។

រូបភាព 5 សន្លឹក

ថ្លែងក្នុងពិធីបើកសិក្ខាសាលា ឯកឧត្តម អនុរដ្ឋលេខាធិការ និងជាតំណាងថ្នាក់ដឹកនាំក្រសួង បានថ្លែងអំណរគុណ និងវាយតម្លៃខ្ពស់ចំពោះការខិតខំប្រឹងប្រែងរបស់លោកគ្រូ អ្នកគ្រូ ជាគ្រូឧទ្ទេស និងលោកគ្រូ អ្នកគ្រូ ដែលជាគ្រូជំនួយថ្នាក់រៀន ដែលបានចូលរួមយ៉ាងផុសផុល បង្ហាត់បង្រៀនសិស្សរយៈពេល ១ឆមាសកន្លងមក និងទទួលបានលទ្ធផលល្អគួរឱ្យកត់សម្គាល់។ ទន្ទឹមនឹងនេះ ឯកឧត្តមក៏បានផ្ដាំផ្ញើ និងលើកទឹកចិត្តដល់លោកគ្រូ អ្នកគ្រូជំនួយទាំងអស់ ត្រូវយកចិត្តទុកដាក់រៀនសូត្រ ក្រេបយកចំណេះដឹង សម្រាប់យកទៅជួយសិស្សបន្តនៅតាមសាលារៀនរៀងៗខ្លួន។

គួរបញ្ជាក់ផងដែរថា ក្នុងឆ្នាំសិក្សា២០២៥-២០២៦ នេះ ក្រសួងអប់រំ យុវជន និងកីឡា បានដាក់ឱ្យអនុវត្តគន្លងអប់រំថ្មីនៅកម្រិតមធ្យមសិក្សាទុតិយភូមិ (ថ្នាក់ទី១០-១២) នៅតាមគ្រឹះស្ថានសិក្សាចំនួន ៤៩ ដើម្បីបើកច្រកដល់អ្នកសិក្សាឱ្យមានជម្រើសកាន់តែច្រើនក្នុងការសម្រេចចិត្តរៀបចំផែនការសិក្សា ជ្រើសរើសផ្លូវសិក្សា និងផែនការអាជីព សមស្របតាមលក្ខណៈសម្បត្តិផ្ទាល់ខ្លួន ឧបនិស្ស័យ សមត្ថភាពពីកំណើត និងចំណូលចិត្តរបស់បុគ្គលម្នាក់ៗ ក្នុងន័យកសាងមូលធនមនុស្សប្រកបដោយបរិយាបន្ន និងភាពធន់៕

សូមចុចអាន៖ https://www.facebook.com/share/p/18K76zJc4f/