ថ្ងៃទី៨ មិថុនា ២០២៦
ពិធីចុះហត្ថលេខាលើអនុស្សរណៈនៃការយោគយល់គ្នារវាងក្រសួងអប់រំ យុវជន និងកីឡា និងក្រុមហ៊ុន Huawei Technologies (Cambodia) Co., Ltd. ដើម្បីគាំទ្រការអនុវត្តយុទ្ធសាស្ត្រអប់រំឌីជីថលសម្រាប់សាលារៀន
រាជធានីភ្នំពេញ៖ នាព្រឹកថ្ងៃទី៨ ខែមិថុនា ឆ្នាំ២០២៦ ក្រសួងអប់រំ យុវជន និងកីឡា និងក្រុមហ៊ុន Huawei Technologies (Cambodia) Co., Ltd. បានរៀបចំពិធីចុះហត្ថលេខាលើអនុស្សរណៈនៃការយោគយល់គ្នា (Memorandum of Understanding: MoU)ស្តីពីកិច្ចសហប្រតិបត្តិការគាំទ្រការអនុវត្តយុទ្ធសាស្ត្រអប់រំឌីជីថលសម្រាប់សាលារៀន (Digital Education Strategy for Schools) នៅកម្ពុជា។ ពិធីនេះប្រព្រឹត្តទៅក្រោមអធិបតីភាព ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា និងលោក Dilan Huang អនុប្រធានក្រុមហ៊ុន Huawei ប្រចាំតំបន់អាស៊ីអាគ្នេយ៍ ដោយមានការចូលរួមពីថ្នាក់ដឹកនាំ មន្ត្រីពាក់ព័ន្ធនៃក្រសួងអប់រំ យុវជន និងកីឡា និងដៃគូសហការផ្សេងៗ។
អនុស្សរណៈនៃការយោគយល់នេះមានគោលបំណងពង្រឹងកិច្ចសហប្រតិបត្តិការលើការអភិវឌ្ឍហេដ្ឋារចនាសម្ព័ន្ធឌីជីថល ការកសាងសមត្ថភាពធនធានមនុស្ស ការលើកកម្ពស់ជំនាញ ICT និង AI ការអនុវត្តដំណោះស្រាយអប់រំឆ្លាតវៃនិងការពង្រឹងប្រព័ន្ធគ្រប់គ្រងទិន្នន័យក្នុងវិស័យអប់រំស្របតាមទិសដៅអភិវឌ្ឍវិស័យអប់រំរបស់កម្ពុជា។ តាមរយៈកិច្ចសហការនេះភាគីទាំងពីររំពឹងថានឹងរួមចំណែកជំរុញការផ្លាស់ប្ដូរឌីជីថលក្នុងវិស័យអប់រំនិងពង្រីកឱកាសសិក្សាប្រកបដោយគុណភាព និងបរិយាបន្នសម្រាប់សិស្សានុសិស្សកម្ពុជា។
រូបភាព 6 សន្លឹក
សូមចុចអាន៖ https://www.facebook.com/share/p/196e9GVSrk/
