ឯកឧត្តមបណ្ឌិត ឃី សុវណ្ណរតនា រដ្ឋលេខាធិការ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី «ការកសាងសមត្ថភាពការទូតឌីជីថលសម្រាប់មន្រ្តីការទូតកម្ពុជា»

នៅព្រឹកថ្ងៃទី២១ ខែមេសា ឆ្នាំ២០២៦ ឯកឧត្តមបណ្ឌិត ឃី សុវណ្ណរតនា រដ្ឋលេខាធិការ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី «ការកសាងសមត្ថភាពការទូតឌីជីថលសម្រាប់មន្រ្តីការទូតកម្ពុជា» នៅសណ្ឋាគារ SUN & MOON Riverside រាជធានីភ្នំពេញ។ ពិធីបើកវគ្គបណ្តុះបណ្តាលនេះក៏មានការចូលរួមពី ឯកឧត្តម ចឺយ វិចិត្ត ប្រធានវិទ្យាស្ថានជាតិការទូត និងទំនាក់ទំនងអន្តរជាតិ និងលោកជំទាវ ZHONG Jie អគ្គទីប្រឹក្សា នៃស្ថានទូតសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា ផងដែរ។

វគ្គបណ្តុះបណ្តាលនេះ សហការរៀបចំឡើងដោយ វិទ្យាស្ថានជាតិការទូតនិងទំនាក់ទំនងអន្តរជាតិ និងវិទ្យាស្ថានវិជ្ជាជីវៈពាណិជ្ជកម្មអន្តរជាតិខេត្តហ៊ូណាន និងទទួលបានការគាំទ្រពីក្រសួងការបរទេស និងសហប្រតិបត្តិការអន្តរជាតិ ក្រសួងពាណិជ្ជកម្មនៃសាធារណៈរដ្ឋប្រជាមានិតចិន និងស្ថានទូតសាធារណៈរដ្ឋប្រជាមានិតចិនប្រចាំកម្ពុជា ដោយមានការចូលរួមពីមន្រ្តីចំនួន ៣០រូប មកពីក្រសួងការបរទេស និងសហប្រតិបត្តិការអន្តរជាតិ ក្រសួងប្រៃសណីយ៍ និងទូរគមនាគមន៍ ក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ក្រសួងការងារ និងបណ្តុះបណ្តាលវិជ្ជាជីវៈ និងក្រសួងផែនការ។

រូបភាព 5 សន្លឹក

វគ្គបណ្តុះបណ្តាលនេះមានគោលបំណងពង្រឹងសមត្ថភាពមន្រ្តីកម្ពុជាលើវិស័យការទូតឌីជីថល និងដើម្បីលើកកម្ពស់ការអនុវត្តការទូតឌីជីថលឱ្យមានប្រសិទ្ធភាពខ្ពស់ និងបន្តពង្រឹងកិច្ចសហប្រតិបត្តិការជាយុទ្ឋសាស្រ្តរវាងកម្ពុជា និងចិន។

ថ្លែងក្នុងឱកាសបើកកម្មវិធី ឯកឧត្តមបណ្ឌិតរដ្ឋលេខាធិការ បានសង្កត់ធ្ងន់ថា ការទូតឌីជីថល គឺច្រកផ្លូវដ៏សំខាន់បំផុតមួយ សម្រាប់ជំរុញគោលនយោបាយការបរទេស ការគ្រប់គ្រងទំនាក់ទំនងអន្តរជាតិ ពាណិជ្ជកម្ម និងការកសាងភាពជាដៃគូយុទ្ធសាស្រ្តក្នុងវិស័យនយោបាយ-សន្តិសុខ សេដ្ឋកិច្ច និងសង្គម-វប្បធម៌។

សូមចុចអាន៖ https://www.facebook.com/share/p/1MDP6td8um/