ឯកឧត្តមអគ្គលេខាធិការ ជា សេរីវឌ្ឍ បានអញ្ជើញតំណាងប្រទេសកម្ពុជា ដើម្បីបង្ហាញពីភាពជោគជ័យនៃថ្នាលផ្ទៀងផ្ទាត់ឯកសារ verify.gov.kh ក្នុងវេទិកាអភិបាលកិច្ចល្អ នៃកិច្ចប្រជុំកិច្ចសហប្រតិបតិ្តការអាស៊ាន លើកទី២៣ (23rd ACCSM) និងកិច្ចប្រជុំអាស៊ានបូកបីលើកទី៨ (8th ACCSM+3)

ខេត្តសៀមរាប៖ នាព្រឹកថ្ងៃទី៤ ខែសីហា ឆ្នាំ២០២៦ ឯកឧត្តម ជា សេរីវឌ្ឍ អគ្គលេខាធិការនៃអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល (គ.រ.ឌ.) បានអញ្ជើញតំណាងប្រទេសកម្ពុជា ដើម្បីធ្វើបទបង្ហាញ និងចែករំលែកបទពិសោធនៃការដាក់ឱ្យប្រើប្រាស់ថ្នាលផ្ទៀងផ្ទាត់ឯកសារ verify.gov.kh ជាគំរូជោគជ័យដ៏លេចធ្លោមួយ ដល់បណ្តាប្រទេសអាស៊ាន និងអាស៊ានបូកបីនៅក្នុងកិច្ចពិភាក្សាវគ្គទី២ នៃវេទិកាអភិបាលកិច្ចល្អ ដែលផ្តោតការយកចិត្តទុកដាក់លើ «ការបង្កើនសមត្ថភាពឌីជីថលក្នុងការផ្តល់សេវាសាធារណៈ» អំឡុងពេលកិច្ចប្រជុំកិច្ចសហប្រតិបត្តិការអាស៊ាន លើកទី២៣ (23rd ACCSM) និងកិច្ចប្រជុំអាស៊ានបូកបី លើកទី៨ (8th ACCSM+3) ស្តីពីកិច្ចការមុខងារសាធារណៈ ដែលកម្ពុជាជាប្រធានប្តូរវេន។

🇰🇭 កម្ពុជាបានសម្រេចជ្រើសរើសយកថ្នាល verify.gov.kh មកធ្វើជាប្រធានបទស្នូល ដោយផ្អែកលើចំណុចសំខាន់ៗចំនួន ៤ ដូចជា៖ (១) ស្របតាមមូលបទកិច្ចប្រជុំគឺ «នវានុវត្តន៍សម្រាប់ការផ្តល់សេវាសាធារណៈឱ្យកាន់តែប្រសើរឡើង» (២) ថ្នាលនេះទើបតែឈ្នះ «ពានរង្វាន់សេវាសាធារណៈអង្គការសហប្រជាជាតិឆ្នាំ២០២៦» ក្នុងចំណោមប្រព័ន្ធជាង៧០០ មកពី ៦២ប្រទេស (៣) ជាថ្នាលដែលជួយលុបបំបាត់ការក្លែងបន្លំឯកសារ ធានាសន្តិសុខសាយប័រ និងកាត់បន្ថយការចំណាយខ្ពស់ និង (៤) ជាថ្នាលដែលត្រូវបានទទួលស្គាល់ជា ហេដ្ឋារចនាសម្ព័ន្ធសាធារណៈឌីជីថល (DPI) ទី៤ នៅលើសកលលោក ខណៈកម្ពុជាក៏កំពុងចែករំលែកបទពិសោធនេះ ដល់ប្រទេសដទៃផងដែរ។

រូបភាព 5 សន្លឹក

ការលើកយកសមិទ្ធផលនេះមកបង្ហាញនៅលើឆាកអន្តរជាតិ មិនត្រឹមតែសបញ្ជាក់ពីសមត្ថភាពពិតប្រាកដរបស់អ្នកជំនាញឌីជីថលកម្ពុជាប៉ុណ្ណោះទេ តែថែមទាំងឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាល ក្រោមការដឹកនាំរបស់សម្តេចធិបតី ហ៊ុន ម៉ាណែត ក្នុងការជំរុញបរិវត្តកម្មរដ្ឋាភិបាលឌីជីថលឱ្យកាន់តែស៊ីជម្រៅ និងមានប្រសិទ្ធភាពខ្ពស់៕

សូមចុចអាន៖ https://www.facebook.com/share/p/1DGwAxWEw6/