ថ្ងៃទី២២ កក្កដា ២០២៦
ធនាគារជាតិនៃកម្ពុជា សហការជាមួយមជ្ឈមណ្ឌលស៊ាសិន (SEACEN) បានរៀបចំសន្និសីទ ស្តីពី “មូលធនមនុស្សលើកទី៨”
ធនាគារជាតិនៃកម្ពុជា សហការជាមួយមជ្ឈមណ្ឌលស៊ាសិន (SEACEN) បានរៀបចំសន្និសីទ ស្តីពី “មូលធនមនុស្សលើកទី៨” នាថ្ងៃទី១៤ ខែកក្កដា ឆ្នាំ២០២៦ និងកិច្ចប្រជុំថ្នាក់ប្រធាននាយកដ្ឋានធនធានមនុស្សនិងបណ្តុះបណ្តាលលើកទី៤៦ នាថ្ងៃទី១៥ ខែឆ្នាំដដែល នៅរាជធានីភ្នំពេញ។
សន្និសីទស្តីពីមូលធនមនុស្សលើកទី៨ បានប្រព្រឹត្តិទៅក្រោមអធិបតីភាព ឯកឧត្តម ស៊ុំ សន្និសិទ្ធ ទេសាភិបាលរង ធនាគារជាតិនៃកម្ពុជា តំណាងដ៏ខ្ពង់ខ្ពស់ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា និងលោកស្រី បណ្ឌិត Cynyoung Park នាយកប្រតិបត្តិនៃមជ្ឈមណ្ឌលស៊ាសិន។ នៅក្នុងសន្និសីទនេះ វាគ្មិនដែលជាមន្ត្រីជំនាញនៃធនាគារកណ្តាល ព្រមទាំងអ្នកជំនាញឯករាជ្យផ្នែកធនធានមនុស្សនិងភាពជាអ្នកដឹកនាំមកពីប្រទេសកាណាដា បានធ្វើបទឧទ្ទេសនាមដោយផ្ទាល់ ក្នុងគោលបំណងចែករំលែកចំណេះដឹង និងបទពិសោធជាក់ស្តែងដល់សិក្ខាកាមលើ i/-ការដឹកនាំ និងអភិបាលកិច្ច ii/-គណនេយ្យភាពរបស់ស្ថាប័ន និង iii/-ទស្សនាទានបែបឌីជីថលក្នុងការគ្រប់គ្រងមូលធនមនុស្ស។
រូបភាព 6 សន្លឹក
ដោយឡែក កិច្ចប្រជុំថ្នាក់ប្រធាននាយកដ្ឋានធនធានមនុស្ស និងបណ្តុះបណ្តាលលើកទី៤៦ បានដំណើរការទៅក្រោមការដឹកនាំដោយលោកស្រីបណ្ឌិត Cynyoung Park នាយកប្រតិបត្តិនៃមជ្ឈមណ្ឌលស៊ាសិន និងលោក វី ស័ក្កដា ប្រធាននាយកដ្ឋានបុគ្គលិក តំណាងធនាគារជាតិនៃកម្ពុជា។ កិច្ចប្រជុំនេះមានការចូលរួមពីប្រធាននាយកដ្ឋាន និងមន្ត្រីជំនាញដែលមកពីធនាគារកណ្តាលនៃប្រទេសជាសមាជិក SEACEN ក្នុងគោលបំណងពិនិត្យអំពីសមិទ្ធផលប្រចាំឆ្នាំ២០២៦ និងពិភាក្សាអំពីផែនការឆ្នាំ២០២៧ ដើម្បីឱ្យស្របតាមគុណតម្លៃ និងអភិបាលកិច្ចសម្រាប់ការគ្រប់គ្រង និងការអភិវឌ្ឍធនធានមនុស្សជាក់ស្តែងក្នុងស្ថាប័ន។
