ពិធីបើកសិក្ខាសាលាស្តីពី«ការប្រើប្រាស់កម្មវិធីបញ្ញាសិប្បនិម្មិត(AI)ដើម្បីជំរុញប្រសិទ្ធភាពការងារ»

នាព្រឹកថ្ងៃព្រហស្បតិ៍ ១រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣០ ខែកក្កដា ឆ្នាំ២០២៦ ក្រសួងវប្បធម៌និងវិចិត្រសិល្បៈសហការជាមួយបណ្ឌិត្យសភាបច្ចេកវិទ្យាឌីជីថលកម្ពុជា នៃក្រសួង ប្រៃសណីយ៍និងទូរគមនាគមន៍បានរៀបចំសិក្ខាសាលាស្តីពី«ការប្រើប្រាស់បញ្ញាសិប្បនិម្មិត(AI)ដើម្បីជំរុញ ប្រសិទ្ធភាពការងារ» ដែលប្រព្រឹត្តទៅរយៈពេលពីរថ្ងៃ នៅទីស្តីការក្រសួងវប្បធម៌និងវិចិត្រសិល្បៈ។

ពិធីនេះប្រព្រឹត្តទៅក្រោមអធិបតីភាព ឯកឧត្តម ឡុង ប៉ុណ្ណាស៊ីរីវត្ថ រដ្ឋលេខាធិការ និងជាប្រធានក្រុមការងារបរិវត្តកម្មឌីជីថល តំណាងដ៏ខ្ពង់ខ្ពស់របស់លោកជំទាវបណ្ឌិតសភាចារ្យ រដ្ឋមន្ត្រីក្រសួងវប្បធម៌ និងវិចិត្រសិល្បៈ ដែលមានសិក្ខាកាមចូលរួមចំនួន ១៦០នាក់។

+2

រូបភាព 7 សន្លឹក

សិក្ខាសាលានេះរៀបចំឡើងក្នុងគោលបំណងពង្រឹងសមត្ថភាពមន្ត្រីរាជការលើផ្នែកអក្ខរកម្មឌីជីថលស្របតាមចក្ខុវិស័យនៃការធ្វើបរិវត្តកម្មឌីជីថលពេញលេញត្រឹមឆ្នាំ២០៣៥របស់រាជរដ្ឋាភិបាល។ ក្នុងរយៈពេលនៃអង្គសិក្ខាសាលានេះសិក្ខាកាមនឹងទទួលបានចំណេះដឹង និងបទពិសោធន៍លើប្រធានបទសំខាន់ៗ ចំនួន៤ រួមមាន៖មូលដ្ឋានគ្រឹះបញ្ញាសិប្បនិម្មិត អភិបាលកិច្ចបញ្ញាសិប្បនិម្មិត ការប្រើប្រាស់កម្មវិធីបញ្ញាសិប្បនិម្មិត ដើម្បីជំរុញប្រសិទ្ធភាពការងារ និងការអនុវត្តផ្ទាល់លើកម្មវិធី Google Gemini, ChatGPT, និង NotebookLM និងកម្មវិធីពាក់ព័ន្ធចាំបាច់មួយចំនួនទៀត។

តាមរយៈសិក្ខាសាលានេះ ក្រសួងរំពឹងយ៉ាងមុតមាំថា មន្ត្រីរាជការនឹងអាចចាប់ផ្តើម ទាញយកអត្ថប្រយោជន៍ពី បច្ចេកវិទ្យា AI ដើម្បីសម្រួលកិច្ចការរដ្ឋបាល គ្រប់គ្រងឯកសារ និងរួមចំណែកដល់ការអភិរក្ស លើកស្ទួយ និងអភិវឌ្ឍវប្បធម៌ជាតិឱ្យកាន់តែរឹងមាំក្នុងសម័យកាលឌីជីថល។

សូមចុចអាន៖ https://www.facebook.com/share/p/1Gk493yYAd/