ថ្ងៃទី៥ មេសា ២០២៦
លោកជំទាវ ជា រដ្ឋា រដ្ឋលេខាធិការក្រសួងពាណិជ្ជកម្ម បានអញ្ជើញជាអធិបតីក្នុងកម្មវិធីបើកវគ្គបណ្តុះបណ្តាលស្តីពី «ឌីជីថលូបនីយកម្ម និងការនាំចេញតាមថ្នាលខេមបូឌាត្រេដ (CambodiaTrade.com)»
(ភ្នំពេញ)៖ នាព្រឹកថ្ងៃសុក្រ ទី៣ ខែមេសា ឆ្នាំ២០២៦ នៅទីស្តីការក្រសួងពាណិជ្ជកម្ម លោកជំទាវ ជា រដ្ឋា រដ្ឋលេខាធិការក្រសួងពាណិជ្ជកម្ម បានអញ្ជើញជាអធិបតីក្នុងកម្មវិធីបើកវគ្គបណ្តុះបណ្តាលស្តីពី «ឌីជីថលូបនីយកម្ម និងការនាំចេញតាមថ្នាលខេមបូឌាត្រេដ (CambodiaTrade.com)» ក្រោមគម្រោងកសាងសមត្ថភាពឌីជីថលរបស់មូលនិធិ ស.អ ដែលមានការអញ្ជើញចូលរួមពី ឯកឧត្តមអនុរដ្ឋលេខាធិការ លោក លោកស្រី ថ្នាក់ដឹងនាំ និងមន្រ្តីក្រសួងពាណិជ្ជកម្ម មន្ទីរពាណិជ្ជកម្មរាជធានី-ខេត្ត ព្រមទាំងតំណាងសមាគមសហព័ន្ធយុវជនសេដ្ឋកិច្ចកម្ពុជា ធុរជន និងសហគ្រាសផលិតក្នុងស្រុក ជាច្រើនរូបផងដែរ។
វគ្គបណ្តុះបណ្តាលនេះ រៀបចំឡើងក្នុ្ងងគោលបំណងដើម្បីពង្រឹងសមត្ថភាពដល់ពាណិជ្ជករ សហគ្រិន និងធុរជន លើការធ្វើពាណិជ្ជកម្មតាមប្រព័ន្ធឌីជីថល និងជួយជំរុញឱ្យពួកគាត់អាចនាំចេញផលិតផលក្នុងស្រុកទៅកាន់ពិភពលោកបានកាន់តែទូលំទូលាយ ព្រមទាំងលើកកម្ពស់កិត្យានុភាពផលិតផលខ្មែរនៅលើឆាកអន្តរជាតិ។
រូបភាព 10 សន្លឹក
បន្ថែមពីនេះ វគ្គបណ្តុះបណ្តាលនេះ មិនត្រឹមតែផ្តោតលើការពង្រឹងបច្ចេកទេសឌីជីថលប៉ុណ្ណោះទេ សកម្មភាពនេះគឺជាយុទ្ធសាស្ត្រគន្លឹះក្នុងការបង្កើនវត្តមានផលិតផលជាតិ #MadeInCambodia រួមទាំងផលិតផលស្ត្រី #MadeByHer នៅលើទីផ្សារសកល តាមរយៈថ្នាលពាណិជ្ជកម្មអេឡិចត្រូនិក CambodiaTrade.com៕
សូមចុចអាន៖ https://www.facebook.com/share/p/1BPzWTmnua/
